सबै निर्माण बर्खा अगावै सम्पन्न गर्न मेयरको निर्देशन

ऋषि भट्टराई

बुटवल उपमहानगरपालिकाका प्रमुख खेलराज पाण्डेयले नगरभित्रका मुख्य योजनाहरुको अनुगमन गर्दै वर्षाअघि सबै काम सम्पन्न गर्न निर्देशन दिएका छन् । चालु आर्थिक वर्षभित्र सम्पन्न गर्नुपर्ने संघ, प्रदेश र बुटवल उपमहानगरपालिकाको लगानीमा निर्माणाधीन योजनाहरुको हिजो प्रमुख पाण्डेय, प्रमुख प्रशासकीय अधिकृत टेकराज पन्थीसहित उपमहानगरपालिकाको टोलीले अनुगमन गरेको थियो ।

बुटवलको गोलपार्कदेखि योगीकुटीसम्मको सडक क्षेत्र, योगीकुटीदेखि कालिका पथ क्षेत्र, योगीकुटीदेखि रानीगञ्जसम्मका सडक, अभियान पथको पर्खाल र निर्माणाधीन योजनाहरुको अनुगमन गर्दै प्रमुख पाण्डेयले समयमै काम सम्पन्न गर्न निर्माण कम्पनीहरुलाई सचेत गराएका हुन् । उनले तोकिएको अवधिभित्र निर्माण सम्पन्न गर्नेलाई पुरस्कृत गर्ने र सम्पन्न नगर्ने कम्पनीलाई दण्डित गरिने समेत बताए ।

नगरप्रमुख पाण्डेयले नगरभित्रका संरचनाको काम तत्काल सम्पन्न गर्न संघ र प्रदेशलाई समेत ताकेता गर्न आग्रह गर्ने जानकारी गराए । बजेट विनियोजन भएका योजनाहरु समयमै पूरा नगर्ने निर्माण कम्पनीलाई कारबाहीका लागि सिफारिस गर्ने उनको भनाइ छ ।

नदीजन्य पदार्थको चोरीनिकासी रोक्न अनुगमन

बुटवल उपमहानगरपालिकाको टोलीले तिनाउ नदी किनार क्षेत्रको अनुगमन गर्दै नदीजन्य पदार्थको चोरी निकासी रोक्न नियमित अनुगमन टोली खटाएको छ । बुटवलतर्फको नदीकिनार क्षेत्रबाट चोरी निकासी बढेको पाइएकाले सीमावर्ती स्थानीय तहमा निर्माण भइरहेका संरचना र निर्माण कम्पनीहरुको समेत निगरानी गर्ने र स्थानीय तहहरुसँग छलफल गरेर नियमनमा ल्याउने नगर प्रमुख खेलराज पाण्डेयले बताए ।

उनले नदीजन्य पदार्थको चोरी निकासी रोक्ने र आगामी वर्षामा बाढी र कटान रोक्न सुरक्षित बनाउने गरी काम गर्न योजना महाशाखा र विपद् शाखालाई निर्देशन दिएका छन् । प्रमुख पाण्डेयले नगरप्रहरीसहितको टोलीले नियमित रुपमा निगरानी गर्ने र चोरीनिकासी रोक्न स्थानीयको समेत साथ आवश्यक रहेको उल्लेख गरे । जिल्ला र नगरका सुरक्षा निकायलाई समेत चोरीनिकासीमा थप संवेदनशील बन्न मेयरको आग्रह छ ।