मुसलधारे वर्षाले काठमाडौं आएको विमान अन्तै डाइभर्ट,बल्खुमा भेटियो पुरुषको शव

गएरातिको अविरल वर्षाका कारण  आएको बाढीले उपत्यकाका बागमती,हनुमन्ते,विष्णुमती,गोदावरी, मनोहरा नदी आसपासका भूभाग डुबेको छ ।  किनारका बस्तीमा पानी पसेकाले ललितपुरको च्यासलस्थित एमाले कार्यालय पनि जलमग्न भएको छ ।

भक्तपुरको जगाती,सल्लाघारी,बाराही क्षेत्र  डुबानमा परेका छन् । बागमती नदी किनारका सुकुम्बासी बस्ती,वरपरका घर तथा कारखानामा बाढी पसेर अस्तव्यस्त देखिएको छ । नदी किनारका सडक पनि जलमग्न भएका छन् ।

"किनारका बस्तीमा पानी पसेकाले ललितपुरको च्यासलस्थित एमाले कार्यालय पनि जलमग्न भएको छ ।"

गएराति हनुमन्ते,बागमतीलगायतका नदीको जलसतहले खतराको तह पार गरेको थियो । खोकनामा बागमती नदीको जलसतह ५ दशमलव ५९ मीटर र गौरीघाटमा २ दशमलव ३४ मीटर पुगेको बताइन्छ । 

दुबईबाट काठमाडौं आइरहेको फ्लाई दुबईको उडान नम्बर एफजेड ५७३ को विमानलाई राति सवा १ बजे काठमाडौंमा अवतरण गर्न नसक्ने भएपछि लखनउ डाइभर्ट गराइएको छ ।

बाढीसङ्गै बल्खुमा एउटा पुरुष शव भेटिएको छ । प्रहरीका अनुसार शवको प्रकृति हेर्दा नदीको बाढीमा डुबेर मृत्यु भएको हुनसक्छ ।

तस्बिरहरु...