जहाँ प्रमुख प्रशासकीयको काम मेयरले गर्छन्

‘नेपालीमा एउटा उखान छ– नपाउनेले के पायो बोक्रैसँग खायो ।’ बेलबारी नगरपालिकाका मेयर दिलप्रसाद (डिपी) राई छन्, जसले बजेट पुस्तिकामा भएको रकम आफ्नो तजबिजमा मात्रै खर्च गर्न दिन्छन् । उनको एकलकाँटे प्रवृत्तिका कारण आफूलाई निर्वाचित गराउने पार्टी एमालेमा भने चरम असन्तुष्टि छ । 

यसअघि ज्ञानेन्द्र सुवेदी मेयर र गणेश दाहाल प्रमुख कार्यकारी अधिकृत हुँदा  मेयरको तोकादेशबाट बजेट दिने काम रोकिएको थियो । तर पछि आपतकालीन अवस्थामा जनतालाई राहत दिन नपाएको भन्दै महिनामा डेढ लाखसम्मको बजेट दिने सहमति गरियो । अहिलेका मेयर दिलप्रसाद राई आएपछि शुरुमा त तोकादेशबाट बजेट नचलाउने भनियो ।

तर, अहिले दमकका गणेश कार्की प्रमुख कार्यकारी अधिकृत यहाँ आएको बेला कर्मचारीकै राय सुझावबमोजिम १५ लाख बजेट रिजर्भमा राखियो र मेयरले खर्च गर्न पाउने भनी तोकिएको सबै रकम महिना दिनमै स्वाहा भयो । हाल विनियोजित बजेटबाट जति पनि खर्च गर्न मेयरलाई अधिकार दिइएको छ । तैपनि, नगरपालिकाले अरुभन्दा पृथक् र विशेष कार्यक्रम वा योजना सञ्चालन गर्न सकेको छैन ।

मेयरले गरेको निर्णय (तोक आदेश) बाट गरिएको खर्च कार्यपालिका बैठकबाट अनुमोदन गराउनुपर्ने निर्णय गरिए पनि २०८० साउनयता खर्च गरेको रकम बैठकमा पेश गरिएको छैन । मेयरले बजेट खर्च गरेकै अवस्थामा अघिल्लो वर्ष बेलबारी नगरपालिकाको साढे १४ करोड फ्रिज भएको थियो ।

हुन त बेलबारी नगरपालिकामा मेयर एमालेका भए पनि कांग्रेसको बहुमत छ । उपमेयरसहित ११ वडामध्ये बहुमत वडाध्यक्ष कांग्रेसकै छन् । तर, पार्टीभन्दा बढी जातिलाई ध्यान दिने प्रवृत्तिका कारण बोलवाला भने एमालेकै चल्ने गरेको छ ।

– उपासना क्षेत्रीबाट