काठमाडौंमा अमेरिकी राजदूतावास नजिकै प्रदर्शनको तयारी

राष्ट्रपति डोनाल्ड ट्रम्प प्रशासनले हालै लिएका निर्णयहरुमाथि पुनर्विचारको माग गर्दै काठमाडौंस्थित संयुक्त राज्य अमेरिकाको राजदूतावास बाहिर प्रदर्शनीको तयारी थालिएको छ । डा. गोविन्द केसी सोलिडारिटी एलायन्सले अमेरिकाका पछिल्ला निर्णयले विश्वको जलवायु, स्वास्थ्य, शिक्षालगायत क्षेत्रमा गम्भीर असर पर्ने ठहर गर्दै निर्णय सच्चाउन आग्रह गर्दै प्रदर्शन गर्न लागेको जनाइएको छ ।

सहभागिताको लागि अनुरोध गर्दै भनिएको छ, ‘ट्रम्प प्रशासनले हालै लिएका कदमले नेपाललगायत संसारका विभिन्न देश तथा त्यसका नागरिकलाई जलवायु परिवर्तन, जनस्वास्थ्य, शिक्षा र जीविकोपार्जन जस्ता क्षेत्रमा नकारात्मक असर पारेको छ ।’ पश्चिम एसियाको गाजापट्टीका प्यालेस्टाइनीहरूको जातीय सफाया गर्ने खालका प्रस्तावले त्यहाँको भू–राजनीति अस्थिर बनेको एलायन्सको ठहर छ । 

अमेरिकाका कतिपय निर्णयले अन्तर्राष्ट्रिय मानवीय कानुनको खिल्ली उडाएको, युद्धग्रस्त युक्रेनले पाइरहेको अमेरिकी सहयोगको अनिश्चितताले उसको अस्तित्व खतरामा परेको भन्दै प्रदर्शन गर्न लागिएको हो । भोलि दिउँसो साढे ३ बजेको समयमा महाराजगञ्ज चोकदेखि दूतावाससम्म प्रदर्शन गरिने स्रोतले बतायो ।

कार्यक्रमको अन्तमा दूतावासमा ज्ञापनपत्र बुझाउने भनिएको छ ।