सरकारविरुद्ध स्टाटस लेख्दा समातिएका रापप्रा नेता छुटे

फेसबुकमा स्टाटस लेखेर सरकारको आलोचना गरेवापत पक्राउ परेका राष्ट्रिय प्रजातन्त्र पार्टी (राप्रपा) को युवा संगठनका संयोजक सुजित केसी छुटेका छन् । 

सर्वोच्च अदालतले उनलाई रिहा गर्न आदेश गरेको छ । केसीतर्फबाट परेको बन्दी प्रत्यक्षीकरण रिटमा न्यायाधीशद्वय बालकृष्ण ढकाल र नित्यानन्द पाण्डेयको इजलासले आज उनलाई छोड्न आदेश दिएको हो ।

सरकारको विरोधमा फेसबुकमा लेखेको आरोपमा गत शुक्रबार उनलाई प्रहरीले समातेको थियो । गैरकानुनी थुनामा राखेको दाबीसहित अधिवक्ता राजकुमार श्रेष्ठले सोही दिन प्रहरी प्रधान कार्यालय, साईवर व्युरो र गृह मन्त्रालयलाई विपक्षी बनाएर बन्दी प्रत्यक्षीकरणको रिट दर्ता गरेका थिए ।