गोली लागेका लागुपदार्थ कारोबारीको उपचार जारी

नेपाल प्रहरीको लागुऔषध नियन्त्रण ब्यूरोले गोली प्रहार गरी नियन्त्रणमा लिएको दुई जना लागुपदार्थ कारोबारीको राष्ट्रिय ट्रमा सेन्टरमा उपचार भइरहेको छ । बायाँ खुट्टामा गोली हानेर नियन्त्रणमा लिइएका भारतको पश्चिम बंगाल राज्यका ४० वर्षीय साशिक आलम र बिहारका २२ वर्षीय मोहम्मद मञ्जुर आलमलाई ट्रमा सेन्टर पुर्याइएको हो । 

‘ब्राउन सुगर’को खरिदबिक्री तथा ओसारपसारको सूचनाका आधारमा ब्यूरोबाट परिचालित टोलीले काठमाडौं महानगरपालिका–११, सुन्धाराबाट पठाना दानापुरका २० वर्षीय सुमित कुमार र चन्दनकुमार जैसवाललाई पक्राउ गरेको थियो । उनीहरुले टोखा नगरपालिका–३ स्थित ग्राण्डी अन्तर्राष्ट्रिय अस्पतालको पछाडि लागुऔषध कारोबार हुन लागेको सूचना दिएपछि प्रहरी निरीक्षक राकेश यादवको कमाण्डमा पाँच जनाको टोली खटियो ।

सो क्रममा ब्यूरोले स्पिकरभित्र लुकाएको दुई सय ग्राम लागुपदार्थ बरामद गरेको हो । उनीहरुलाई नियन्त्रणमा लिने क्रममा रड आक्रमण भएपछि प्रहरीले चार राउण्ड गोली प्रहार गरेको बताइन्छ । त्यसपछि थप तीन राउण्ड गोली प्रहार गरिएको ब्यूरोका सूचना अधिकारी प्रहरी उपरीक्षक (एसपी) जनकबहादुर शाहीले बताए । 

लागुपदार्थ कारोबारीहरुको आक्रमणबाट प्रहरी वरिष्ठ हवल्दार नवराज घिसिङको बायाँ घुँडा र प्रहरी सहायक निरीक्षक रविन्द्र केसीको दाहिने पाखुरामा चोट लागेको छ ।