माधवलाई जोगाउन खोज्दा बदलाको भावनाले हेरिएको झलनाथको गुनासो

जन आस्था

साउन २६, २०८२

नेकपा एकीकृत समाजवादीका सम्मानित नेता झलनाथ खनालले अध्यक्ष माधवकुमार नेपाललाई पदच्युत गर्न नखोजेको प्रष्टिकरण दिएका छन् । पतञ्जली जग्गा प्रकरणमा माधवलाई भ्रष्टाचार मुद्दा लागेपछि आफूले मार्गप्रशस्त गर्न सचिवालय बैठकमा राखेको प्रस्तावलाई बदलाको भावनाका रूपमा नबुझ्न उनले पार्टीपंतिलाई आग्रह गरे ।

पतञ्जली प्रकरणमा पूर्व प्रधानमन्त्री नेपालविरुद्ध विशेष अदालतमा भ्रष्टाचार मुद्दा दायर भएको छ । २०६६ सालमा पतञ्जली योगपीठ तथा आयुर्वेद कम्पनीले काभ्रेपलाञ्चोकको बनेपामा हदबन्दी छुटमा ५ सय ९३ रोपनी जग्गा खरिद गरी ३ सय ५३ रोपनी १५ आना काष्ठमण्डप हाउजिङ कम्पनीलाई बेचेको प्रकरणसँग यो मुद्दा सम्बन्धित छ ।

तत्कालीन प्रधानमन्त्री माधव नेपालले २०६६ माघ १८ मा मन्त्रिपरिषद्को निर्णयमार्फत पतञ्जलीलाई ८ सय १५ रोपनी जग्गा खरिद गर्न हदबन्दी छुट दिएको र दुई महिना नबित्दै २०६६ चैत ६ मा उक्त जग्गा बेच्न स्वीकृति दिएको आरोप छ । यो निर्णय कानूनविपरीत रहेको र नीतिगत भ्रष्टाचार भएको भन्दै अख्तियारले २०८२ जेठ २२ मा नेपालसहित ९३ जनाविरुद्ध मुद्दा दायर गरेको थियो । मुद्दामा १८ करोड ५८ लाख ५० हजार रुपैयाँ बिगो माग गरिएको छ ।

मुद्दा दर्ता भएसँगै अध्यक्ष नेपालको सांसद पद निलम्वन छ । सोही विषयमा सम्मानित नेता खनालको यो टिप्पणी आएको हो । यो मुद्दा माधव नेपाललाई मात्रै लागेको नभइ सिंगो पार्टीलाई नै हो भन्ने कतिपयले टिप्पणी गरिरहेको भन्दै असन्तुष्टि जनाएका उनले यसलाई गलत भनेका छन् ।

यो बुझाईलाई कच्चापन र बचपनाको संज्ञा दिएका नेता खनालले असैद्धान्तिक, अराजनीतिक र संवैधानिक मर्मविपरीतका कुराहरू नगर्न नेताहरूलाई सचेत पनि गराए । यसले अध्यक्ष नेपाललाई झन बढी समस्या पार्ने जिकिर उनको छ ।

‘उहाँ (माधव नेपाल) ले कसरी पार्टी छोडेर गइदिए हुन्थ्यो भन्ने शब्द खुस्काउनुभयो । म अचम्मित छु । माधव कमरेडलाई यत्रो ठूलो मुद्दा लागेको छ । १९ करोडको मुद्दा लागेको छ’, उनले भने, ‘तर कसरी माधव कमरेडलाई बचाउने होला, उहाँको मुद्दालाई अनुकुल कसरी बनाउने होला । उहाँको प्रतिवादीलाई कसरी प्रभावकारी बनाउने होला ? यो कुरामा म जहिले पनि सोचिरहको छु । मैले सचिवालयमा राखेको प्रश्ताव पनि त्यसै दिशामा छ । उहाँलाई अनुकुलता थपियोस् भनेर । ता की उहाँले यो मुद्दाबाट मुक्ति पाउन सक्नुहोस् भनेर ।’

विगतमा केपी शर्मा ओली, राधाकृष्ण मैनाली, घनेन्द्र बस्नेत लगायतमाथि पनि मुद्दा लागेको र त्यसविरुद्ध राजनीतिक र कानुनी रुपमा लडेको स्मरण गर्दै खनालले माधवमाथि पनि मुद्दा लागिसकेकाले कच्चा काम गर्न नहुनेमा जोड दिए । यो कुरा अध्यक्ष स्वयम्ले बुझ्नुपर्ने उनले बताए ।

‘मुद्दा पहिलो पटक मात्रै देखेको, बुझेको होइन होला । थुप्रै नेता, कार्यकर्तामाथि मुद्दा लागेका छन् । केपी कमरेड, आरके कमरेड, घनेन्द्र कमरेडमाथि मुद्दा लागेको थियो । ति मुद्दाका विरुद्ध एउटा पञ्चायती तानाशाही शासनले मुद्दा लगाएको थियो’, खनालले थपे, ‘ति मुद्दाका विरुद्ध हामीले व्यापक रुपमा लड्यौँ त । राजनीतिक रुपले लड्यौँ, कानूनी रुपले लड्यौँ । यसमा उहाँले धेरै कच्चा काम गर्नुहोला भनेर आशा गर्दिन । परिपक्व काम गर्नुस् भनेर नै मैले एउटा प्रस्ताव नै पेश गरेको छु । त्यो प्रश्ताव असाध्यै सोचि विचारीकन यो पार्टी जस्तो रेभिलुसनरी पार्टीले कस्तो स्ट्याण्डर बसाउने भन्ने हो । मैले माक्सवादी प्रश्ताव र नयाँ नजिर बसाउने प्रश्ताव प्रश्तुत गरेको छु । त्यो प्रश्तावलाई यो त माधव कमरेडलाई उखेलेर फ्याँक्ने, सत्ताच्युत गर्ने, बदलाको भावना लिएर आउने भन्ने गरी कसैले हरेको छ भने यो असाध्यै कच्चापन हो । बच्पनापन पनि हुनेछ ।’