ट्रकको ठक्करबाट सख्त घाइते महिला बितिन्

मिनी ट्रकले मोटरसाइकललाई ठक्कर दिँदा एक जनाको मृत्यु भएको छ । पाँचथरको मिक्लाजुङ गाउँपालिका–५ घर भई काठमाडौंको काँडाघारी बस्दै आएकी ३४ वर्षीय सम्झना राईको कोटेश्वरमा भएको दुर्घटनामा मृत्यु भएको प्रहरीले जनाएको छ ।

कोटेश्वरबाट जडीबुटीतर्फ जाँदै गरेको ना.५ख २८१९ नम्बरको मिनी ट्रकले गए राति जडीबुटीतिरै गइरहेको बा.७१प ३०५४ नम्बरको मोटरसाइकललाई ठक्कर दिँदा राई सख्त घाइते भएकी थिइन् ।

महाराजगञ्जस्थित त्रिवि शिक्षण अस्पतालमा उपचारको क्रममा उनको राति नै मृत्यु भएको प्रहरीले जनाएको छ । ठक्कर दिने मिनी ट्रकका चालकलाई नियन्त्रणमा लिएको प्रहरी प्रभाग कोटेश्वरले जनाएको छ ।