टेम्पोलाई बोलेरोले ठक्कर दिँदा एकको मृत्यु, छ घाइते

महोत्तरी जिल्लाको बर्दिबास नगरपालिका–३ मा गएराति टेम्पोलाई बोलेरो पिकअपले ठक्कर दिँदा एक जनाको मृत्यु भएको छ । अन्य छ जना घाइते भएका छन् ।

मृत्यु हुनेमा बर्दिबास नगरपालिका–३ का २६ वर्षीया कुन्ता ढुंगेल रहेको जिल्ला प्रहरी कार्यालयका प्रवक्ता प्रहरी नायव उपरीक्षक प्रकाश विष्टले जानकारी दिए । घाइते ढुंगेलको जनकपुरस्थित काव्या अस्पतालमा उपचारको क्रममा आज बिहान मृत्यु भएको हो ।

टेम्पो चालक बर्दिबास नपा–३ का ४५ वर्षीय ओमबहादुर लुङ्गेली, स्थानीय ४२ वर्षीय यादवकुमार ढुंगेल, २९ वर्षीया पवित्रा आचार्य, आठ वर्षीया करिष्मा ढुंगेल, सिन्धुलीको दुधौली नपा–२ का ३५ वर्षीय पुरुषोत्तम चालिसे र ३९ वर्षीया पवित्रा चालिसे पनि घाइते भएका छन् ।

उनीहरुको बर्दिबासस्थित जनसेवा अस्पतालमा उपचार भइरहेको प्रहरीले बताएको छ ।

गएराति बर्दिबास नगरपालिका–३ स्थित स्मृतिपार्क नजिकैबाट पाटुतर्फ जाँदै गरेको ज. १ ह ३५०१ नम्बरको टेम्पोलाई विपरीत दिशाबाट आउँदै गरेकोे नम्बर नखुलेको बोलेरो पिकअपले ठक्कर दिँदा दुर्घटना भएको प्रहरीले जनाएको छ ।