आज पनि ट्रिपर र मोटरसाइकल ठोक्कियो, दुईको मृत्यु

भक्तपुरको सूर्यविनायक नगरपालिका ८, आदर्शचोक नजिकै ट्रिपर र मोटरसाइकल ठोक्किँदा मोटरसाइकलमा सवार दुई जनाको मृत्यु भएको छ ।

अरनिको राजमार्गमा सूर्यविनायकबाट जगातीतर्फ जाँदै गरेको बा.८९ प ७८७६ नम्बरको मोटरसाइकल र विपरीत दिशाबाट आउँदै गरेको बा. ४ ख ५२९८ नम्बरको ट्रिपर आज बिहान साढे २ बजे आपसमा ठोक्किँदा दुई जनाको मृत्यु भएको हो ।

मृतकमध्ये भक्तपुर नगरपालिका–२ ब्यासी बस्ने १९ वर्षीय निश्चल चौगुठीको मात्र सनाखत भएको जिल्ला प्रहरी परिसर भक्तपुरका डिएसपी राजु पाण्डेले जानकारी दिए । अन्दाजी २१ वर्षको देखिने अर्का एक युवकको भने अझै सनाखत हुन सकेको छैन ।

अहिले मृतकको शव भक्तपुर अस्पतालमा राखिएको छ । दुर्घटनामा गम्भीर घाइते भएका उनीहरुको भक्तपुर अस्पतालमा उपचारको क्रममा आज बिहान ३ बजे मृत्यु भएको हो ।

ट्रिपर चालक दोलखाको मेलुङ–३ घर भइ हाल काठमाडौंको सुकेधारा बस्ने ३५ वर्षीय धनबहादुर थोकरलाई प्रहरी वृत्त जगातीले नियन्त्रणमा लिएको डिसएपी पाण्डेले बताए । घटनाको सम्बन्धमा थप अनुसन्धान भइरहेको छ ।