गाडीको ठक्करबाट दुई मोटरसाइकल चालक बिते

झापामा ट्रकको ठक्करबाट मोटरसाइकल चालकको मृत्यु भएको छ । कमल गाँउपालिका–४ चुलाचुलीमा गएराति ट्रकको ठक्करबाट मोटरसाइकल चालक दिपक नेपालको मृत्यु भएको हो ।

दमक नगरपालिका–९ का ३७ वर्षीय नेपालले चलाएको प्रदेश १–०१–०१२ प १४५३ नम्बरको मोटरसाइकललाई ना. ७ ख ८७३५ नम्बरको ट्रकले ठक्कर दिएको थियो । सोही क्रममा गम्भीर घाइते भएका उनको दमक अस्पतालमा मृत्यु भएको प्रहरीले जनाएको छ । ट्रक चालकलाई इलाका प्रहरी कार्यालय दमकले नियन्त्रणमा लिएको छ ।

यता काठमाडौँको बालाजुमा पनि भ्यानले मोटरसाइकललाई ठक्कर दिएको छ । गएराति भएको दुर्घटनामा मोटरसाइकल चालक चन्द्रागिरि नगरपालिका–२ का ३९ वर्षीय सञ्जिव कार्कीको ज्यान गएको हो ।

बा. ६ च ४८११ नम्बरको टाटा डि.आई भ्यान र बा. ७५ प २२५९ नम्बरको मोटरसाइकल बालाजुस्थित भाटभटेनी डिपार्टमेन्टल स्टोर अगाडि ठोक्किएका थिए । दुर्घटनामा घाइते भएका उनको उपचारको क्रममा महाराजगञ्जस्थित त्रिवि शिक्षण अस्पतालमा मृत्यु भएको हो । भ्यान चालकलाई प्रहरी वृत्त बालाजुले नियन्त्रणमा लिएको छ ।