अरनिको राजमार्गमा स्कुटी र बस ठोक्कियो, एकको मृत्यु

भक्तपुरको गठ्ठाघरमा सवारी दुर्घटनामा एक जनाको ज्यान गएको छ । मध्यपुर थिमी नगरपालिका ३, गठ्ठाघरस्थित ट्राफिक कार्यालय अगाडि बस र स्कुटी ठोक्किँदा रामेछाप घर भई हाल काठमाडौंको जडिबुटीमा बस्दै आएकी २४ वर्षीया रेजिना तामाङको मृत्यु भएको हो ।

जिल्ला प्रहरी परिसर भक्तपुरका अनुसार रामेछापकै दोरम्बा गाउँपालिका–५ घर भई जडिबुटी बस्ने १८ वर्षीय स्कुटी चालक सिद्धार्थ मगर भने घाइते भएका छन् । उनको भक्तपुर इन्टरनेशनल अस्पताल कौशलटारमा उपचार भइरहेको छ ।

बस चालक काभ्रेपलान्चोक तिमाल गाउँपालिका–५ नारायणस्थानका ५० वर्षीय पोते तामाङलाई पक्राउ गरी थप अनुसन्धान गरिएको बताइएको छ ।