निर्वाचन विरोधी कमरेडहरु धमाधम समातिँदै

भोलि हुने प्रतिनिधि सभा तथा प्रदेश सभा निर्वाचनको विरोध गर्दै आएका विभिन्न वामपन्थी दलका नेता तथा कार्यकर्ता पक्राउ पर्ने क्रम आज पनि जारी छ । सुरक्षा निकायको विशेष निगरानीमा परेकालाई राजधानीका विभिन्न स्थानबाट पक्राउ गरिएको बताइएको छ ।

आज दिउँसो पौने ४ बजेको समयमा मोहन वैद्य किरण समूहका एक जना कार्यकर्तालाई गोदावरीबाट समातिएको हो । नेकपा माओवादी क्रान्तिकारीको ट्रेड युनियन अध्यक्ष श्याम केसीलाई प्रहरीले नियन्त्रणमा लिएको बताइएको छ ।

आजै दिउँसो साढे २ बजेको समयमा मंगलबजारबाट विप्लव समूहका महेश बज्राचार्य पनि पक्राउ परेका छन् । विप्लवका ललितपुर महानगर इञ्चार्ज बज्राचार्यलाई पनि चुनाव बिथोल्ने गतिविधिमा सक्रिय भएको पाइएपछि नियन्त्रणमा लिइएको प्रहरीको दाबी छ । 

नेकपा बहुमत निकट अखिल क्रान्तिकारीका चार जना नेतालाई काठमाडौंको नयाँ बानेश्वरबाट प्रहरीले पक्रेको हो । क्रान्तिकारी सचिवालय सदस्य गोविन्द विष्ट, काठमाडौं जिल्ला संयोजक हस्त विकका साथै धनराज विक र नरेश विकलाई दिउँसो ४ बजे नयाँ बानेश्वरस्थित एभरेस्ट होटल पछाडिबाट नियन्त्रणमा लिइएको हो । नरेश विक गोकर्णेश्वर नगरपालिकाको उद्धम विकास सहजकर्ता हुन् ।