क्रिकेट खेलाडी भकाभक प्रहरी खोरमा

नेपाली राष्ट्रिय क्रिकेट टोलीका तत्कालीन कप्तान सन्दिप लामिछाने उमेर नपुगेकी किशोरीलाई बलात्कार गरेको आरोपमा दुई महिना जेल बसेर धरौटीमा छुटेका छन् । तर उनी विरुध्दको मुद्दा काठमाडौं जिल्ला अदालतमा विचाराधीन छ र महान्यायाधिवक्ता कार्यालयले सर्वोच्च अदालतमा उच्चको २० लाख धरौटीमा छाड्ने आदेशविरुध्द पुनरावेदन गर्दैछ ।

यता नेपाली राष्ट्रिय क्रिकेट टोलीका पूर्वखेलाडी महबुब आलम र राष्ट्रिय क्रिकेट टोलीका सदस्य आदिल अन्सारीलाई आज प्रहरीले पक्राउ गरेको छ । नेपाल टी–२० क्रिकेट लिगमा खेल मिलेमतो गरेको आरोपमा उनीहरु समातिएका हुन् ।

प्रहरीको केन्द्रीय अनुसन्धान ब्युरो (सीआईबी) ले गरेको अनुसन्धानपछि आलमलाई आज दिउँसो बिराटनगरबाट नियन्त्रणमा लिइएको हो । अन्सारीलाई भने सप्तरीको राजविराजबाट सीआईबीको टोलीले पक्राउ गरेको थियो । 

एक महिनाअघि कीर्तिपुरमा भएको प्रतियोगितामा ‘स्पट फिक्सिङ’ गरेको आरोप लागेपछि उनीहरुमाथि अनुसन्धान थालिएको थियो । उक्त आरोपमाथि राष्ट्रिय खेलकुद परिषद् र अन्तर्राष्ट्रिय क्रिकेट परिषद् (आइसिसी) ले पनि छानबिन गरिरहेको बताइएको छ ।