विश्वासको मत दिएको एक सातामै कर्णाली सरकारबाट एमाले बाहिरियो

नेकपा माओवादी केन्द्र तत्कालीन पाँच दलीय गठबन्धनमा फर्किएपछि संघीय सरकार छाडेको नेकपा एमाले धमाधम प्रदेश सरकारबाट पनि बाहिरिन थालेको छ ।

सत्ता गठबन्धनका दलहरुले प्रदेशमासमेत मिलेर सरकार बनाउन आन्तरिक तयारी तीब्र पारेपछि अप्ठेरोमा परेको एमाले सरकार छाड्न बाध्य भएको हो । यसैबीच एमाले आज कर्णाली सरकारबाट बाहिरिएको छ । 

मुख्यमन्त्री राजकुमार शर्मासमक्ष एमालेका तर्फबाट आर्थिक मामिला तथा योजनामन्त्री विनोदकुमार शाह, उद्योग, पर्यटन, वन तथा वातावरणमन्त्री जीतबहादुर मल्ल र सामाजिक विकासमन्त्री टेकराज पछाईले राजीनामा दिएका छन् । सरकारमा सहभागी तीन जना मन्त्रीले मुख्यमन्त्री शर्मालाई राजीनामा बुझाएसँगै एमाले सरकारबाट पूर्णतः बाहिरिएको हो ।

गत पुस २७ गते एमाले, माओवादी केन्द्र, राप्रपा, एकीकृत समाजवादीको समर्थनमा माओवादी संसदीय दलका नेता शर्मा मुख्यमन्त्री नियुक्त भएका थिए । मुख्यमन्त्रीलाई पहिलो पटक काँग्रेसका १४ सांसद बाहेक सबै सांसदले विश्वासको मत दिएका थिए । तर, राप्रपाले विश्वासको मत फिर्ता लिएपछि चैत १७ गते दोस्रो पटक विश्वासको मत लिँदा एमालेले पनि पक्षमा मतदान गरेको थियो ।  

विश्वासको मत दिएको एक सातामै एमालेले सरकार छाडेपछि अब कर्णालीमा काँग्रेसलाई सत्तामा जान बाटो खुलेको छ । आफ्नो नेतृत्वको बाहेक अन्य सरकार छाड्ने रणनीतिअनुरुप एमालेले यसअघि नै बागमती सरकार छाडिसकेको छ भने मधेसबाट हालै बाहिरिएको छ । अल्पमतमा परे पनि आफ्नै नेतृत्वको कोशी, गण्डकी र लुम्बिनी सरकार भने एमालेले छाडेको छैन ।  

प्रदेश १ मा हिक्मत कार्की मुख्यमन्त्री छन् । उनलाई माओवादी केन्द्र र राप्रपाको समर्थन छ । प्रदेशसभाको अंकगणित हेर्दा माओवादीले समर्थन फिर्ता लिए कार्कीलाई सरकार जोगाउन कठिन हुने देखिन्छ । 

त्यस्तै, गण्डकीका मुख्यमन्त्री खगराज अधिकारी र लुम्बिनीका लीला गिरीलाई माओवादीले साथ छाडिसकेको छ । सुदूरपश्चिममा भने त्यतिबेलाको सत्ता गठबन्धनको एउटा घटक नागरिक उन्मुक्ति पार्टीले विश्वासको मत नदिएपछि एमाले नेतृत्वको सरकार ढलेर प्रदेशसभाको सबैभन्दा ठूलो दलको हैसियतमा काँग्रेसले सरकार बनाएको हो ।