रवि लामिछाने हवाई मार्ग हुँदै काठमाडौँबाट भरतपुर प्रस्थान

उपचुनावको मौन अवधि शुरु भएसँगै काठमाडौँ आएका पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछाने पुन: चितवन फर्किएका छन् । 

आज दिउँसो हवाई मार्ग हुँदै उनी चितवन पुगेका हुन् । बुद्ध एयरको बिएचए-३५९ उडानबाट लामिछाने दिउँसो पौने १ बजे काठमाडौँबाट भरतपुरका लागि प्रस्थान गरेको बताइएको छ । 

लामिछाने बैशाख १० गते हुने उपचुनावमा चितवन क्षेत्र नम्बर २ मा उम्मेदवार रहेका छन् । उनको पार्टीले तनहुँ-१ र बारा-२ मा पनि उम्मेदवार उठाएको छ । अधिकांश समय आफ्नो निर्वाचन क्षेत्रमा भोट माग्न खटिएका उनी तनहुँ र बारामा आयोजित पार्टीको चुनावी सभालाई सम्बोधन गर्न पुग्ने गरेका थिए । 

तर, हिजो मध्यरातिबाट मौन अवधि शुरु भएपछि चुनाव प्रचार प्रसार गर्न रोक लगाइएको छ । त्यसपछि काठमाडौँ आएका लामिछाने आजै भरतपुर फर्किएका हुन् ।