च्यासलमा एमाले अध्यक्षले नाम लिइरहँदा, रवि लामिछाने बालुवाटारमा प्रकट

प्रधानमन्त्री पुष्पकमल दाहाल प्रचण्डसँग राष्ट्रिय स्वतन्त्र पार्टीका सभापति रवि लामिछानेले भेवार्ता गरेका छन् । लामिछाने प्रधानमन्त्री भेट्न प्रधानमन्त्रीको सरकारी निवास बालुवाटार पुगेका हुन् । 

आजको भेटमा समसामयिक राजनीतिक विषयमा छलफल भएको प्रधानमन्त्री दाहालका प्रेस सल्लाहकार गोविन्द आचार्यले जानकारी दिए । नक्कली भुटानी शरणार्थी प्रकरणलाई कानुनी निष्कर्षमा पुर्याउनुपर्ने लामिछानेको आग्रह रहेको बताइएको छ । 

यता, एमाले मुख्यालय च्यासल, ललितपुरमा भइरहेको चौथो केन्द्रीय समिति बैठकमा अध्यक्ष केपी शर्मा ओलीले प्रस्तुत गर्नुभएको राजनीतिक प्रतिवेदनमा रवि लामिछाने र उनको पार्टी रास्वपाको अवस्थाबारे चर्चा गरिएको छ । लामिछानेको दल राजनीतिक अस्थिरताको कारक बन्ने र यसले मुलुकको समस्या समाधान गर्ने वा निकास दिन नसक्ने ओलीको ठहर छ । त्यसैगरी उक्त पार्टीमा देखिएको प्रभावबारे ध्यान दिन आवश्यक रहेको प्रतिवेदनमा उल्लेख छ ।