तिमी–तिमी जस्तै हुनू

तिमी तिमीजस्तै हुनू 
म नि आफूजस्तै हुन्छु
यात्रा हो जीवन साथी
हिँड्दा कहिल्यै नहराउनू
हार्दा कहिल्यै नडराउनू
प्रत्येक हारले जित जन्माउँछ
नभए नि सपना देखाउँछ

हेर त

हो, हाँस्दा सँगै हाँसिदेलान्
साथ सम्झेर ढुक्क नहुनु
आँसु पुछ्दै आँखा खोल्दा
एक्लो पाएर विचलित नहुनू
जिन्दगी अलिकति भाग्य र
धेरै कर्मको संयोग ठान्नू
एउटै बतास र एउटै आकाश भए पनि 
श्वास आफ्नो–आफ्नै ठान्नू
ईश्वर एउटै भए पनि
संस्कार आफ्नो–आफ्नै मान्नू
साथी तिमी तिमीजस्तै हुनू
म नि आफूजस्तै हुन्छु
युद्धको मैदानमा उत्रिएपछि
साहस र कर्तव्यलाई जान्नू
कहिले हुरी, कहिले बतास
घाम–पानीको जिन्दगी ठान्नू
र पनि साथी
एक जुनी न हो जिन्दगी
तिमी तिमीजस्तै हुनू
म नि आफूजस्तै हुन्छु

हो साथी
जे गरे नि
तिमी तिमीजस्तै हुनू ।
तिमी–तिमीजस्तै हुनू ।।