बाजुरामा नाति नै राति जाँड खाएर घरभित्र पसे, नेपालगञ्ज पुगेर फसे

बाजुरामा बलात्कार काण्ड घटाएर भागेका एक युवक नेपालगञ्जबाट समातिएका छन् । बाजुरास्थित जगन्नाथ गाउँपालिका-४ का २० वर्षीय दिलबहादुर बुढा बलात्कार आरोपमा पक्राउ परेका हुन् ।

जिल्ला प्रहरी कार्यालय बाजुरा स्रोतले बुढा नेपालगञ्जमा हिजो पक्राउ परेको र अहिले जिल्ला ल्याउन लागिएको जानकारी दिएको छ । स्रोतका अनुसार नेपालगञ्ज प्रहरीको सहयोगमा उनलाई समातिएको हो ।

प्रहरीका अनुसार एक एकल महिलालाई जबर्जस्ती करणी गरेको आरोपमा समातिएका उनलाई नातामा हजुरआमा पर्ने महिलालाई गत भदौ २२ गते राति सुतिरहेका बेला बलात्कार गरेको आरोप लागेको छ ।

उनी जाँड खाएर एकल महिलाको घरमा पसेको प्रहरीको दाबी छ । त्यसपछि उनकै घरका सदस्यसमेत आएर आफूमाथि कुटपिट पनि गरेको महिलाको भनाई छ ।कुटपिटबाट आफू घाइते भएको र ३ दिनपछि मात्रै होसमा आएको महिलाको दाबी छ । कुटपिटबाट उनको शरीरमा निलडाम परेका छन् ।

यता जिप्रका बाजुराले पनि उक्त विषयमा उजुरी प्राप्त भइसकेको भन्दै आरोपितलाई पक्राउ गरेर जिल्ला ल्याउन लागेको जनाएको छ। यस्तै घटनाबारे थप अनुसन्धान भैरहेको प्रहरीको भनाई छ।