‘ईपीएस पीडित’ को आन्दोलनमा दुई युवाको निधन

कोरिया पीडित भनिएका युवाहरुले आज दिउँसो ललितपुरको ग्वार्कोस्थित ईपीएस कोरिया शाखाअगाडि गरेको प्रदर्शनका क्रममा भएको झडपमा दुई जनाको ज्यान गएको छ । 

झडपमा घाइते भएका डोटीका २२ वर्षीय वीरेन्द्र शाह र अछामका २३ वर्षे सुजन राउतको मृत्यु भएको हो । आज बिहानैदेखि प्रदर्शनमा उत्रिएका युवाहरुले दिउँसो भौतिक पूर्वाधार तथा यातायातमन्त्री प्रकाश ज्वाला सवार गाडीमा आगजनी गरेका थिए । आन्दोलन अराजक बन्दै गएपछि प्रहरीले अश्रुग्याँस हान्नुका साथै हवाई फायरसमेत गरेको थियो । 

शाहको पाटन अस्पतालमा र राउतको किष्ट हस्पिटलमा उपचारका क्रममा निधन भएको जनाइएको छ ।

ईपीएस कोरियन भाषा परीक्षाअन्तर्गत सिप बिल्डिङमा अनुत्तीर्ण भएकाहरुलाई ईपीएस कार्यालयले पुनः आवेदन दिन नपाउने व्यवस्था गरेको थियो । त्यसविरुद्ध युवाहरु अदालतसम्म पुगेका थिए । 

हिजो उच्च अदालत पाटनले उनीहरुलाई सहभागी गराउन आदेश दिएको थियो । तर, ईपीएस कार्यालयले रिट दायरकर्ता १८ जनालाई मात्रै आवेदन दिन आह्वान गरेपछि आज अरु विद्यार्थीहरु आन्दोलनमा उत्रिएका हुन् ।