डढेलो निभाउने क्रममा ज्यान गुमाउनेका परिवारलाई नगद सहयोग

ललितपुरको गोदावरी नगरपालिकाले डढेलो निभाउने क्रममा ज्यान गुमाएका दुई जनाको परिवारलाई जनही पाँच लाख रुपैयाँ राहत उपलब्ध गराउने भएको छ । 

हिजो गोदावरी नगरपालिका–४, बडिखेलस्थित सामुदायिक वनमा लागेको डढेलो नियन्त्रण गर्ने क्रममा स्थानीय शंकर पहरी र रमेश पहरी गम्भीर घाइते भएका थिए । उनीहरुको उपचारको क्रममा निधन भएको हो । 

नगरपालिकाको आज बसेको बैठकले मृतकका परिवारलाई राहतस्वरुप जनही पाँच लाख रुपैयाँ उपलब्ध गराउने निर्णय गरेको प्रवक्ता मिलन सिल्वालले जानकारी दिए । उनले विज्ञप्ति जारी गर्दै भनेका छन्, ‘यस दुःखद घडीमा मृतकका परिवारजनलाई राहतस्वरुप प्रति परिवार पाँच लाख रुपैयाँ उपलब्ध गराउने नगरकार्यपालिकाको आकस्मिक बैठकबाट निर्णय गरिएको छ ।’

अहिले पालिकाको सबै वडामा भीषण डढेलो लागेको र आगो नियन्त्रणका सबै उपाय अपनाउदा पनि पूर्ण नियन्त्रणमा लिन नसकिरहेको समेत प्रवक्ता सिल्वालले बताए ।