अरु डढे पनि सशस्त्रको गोदाममा एक बोरा गोलीका खोका सग्लै

सशस्त्र प्रहरी बल, नेपालको बलम्बुस्थित केन्द्रीय भण्डारमा लागेको भिषण आगलागीसम्बन्धी छानबिन प्रतिवेदन भोलि बुझाईंदै छ । एआइजी बँशी दाहालको संयोजकत्वमा गठित टोलीले चैत २६ गते लागेको आगोको कारण, क्षतिको विवरणबारे विस्तृत रुपमा प्रतिवेदनमा उल्लेख गरेको स्रोतको दाबी छ ।

छानबिन टोलीसँगको कुराकानीमा भण्डारसँग जिम्मेवार कर्मचारीले विद्युत सर्टका कारण आगो लागेको बताए पनि भित्री कुरो अर्कै पाइएको बताइन्छ । भण्डारभित्र खरानी हुनबाट एक बोरा गोलीको खोका भने जोगिएको छ ।

गोलीको खोका भण्डारमा राखियो किन ? कसले राख्यो ? भन्ने विषय पनि महत्वपूर्ण देखिन आएको छ । हुननतः पहिले तामाले मोरिएको खोका आउने भएकाले गालेर भाँडा बनाउन मिल्थ्यो । अहिले त्यस्तो नआउने भएकाले बिक्रीसमेत नहुने नहुँदा किन भण्डारमा खोका जम्मा पारियो ? 

विगतको तीतो यथार्थबारे बताउँदै स्रोत भन्छ, ‘केही महिनाअघि नेपाली सेनाको काठमाडौं–निजगढ फास्ट ट्र्याक परियोजनाबाट हराएको तोपजस्तै बलम्बुमा लागेको आगो हुन सक्छ । बाराको ग्यारेजमा पड्केको उक्त तोपका कारण २-३  जनाको ज्यान गएको र ग्यारेज ध्वस्त भएको थियो ।’

बलम्बुमा भएको आगलागीबाट भण्डारमा स्टोर गरिएको झण्डै पाँच करोड रुपैयाँ बराबरको सामान नष्ट भएको देखिन आएको छ । अर्कोतर्फ ठेकेदारले ल्याएको तर बुझाउन नभ्याएको झण्डै १८ करोड रुपैयाँको सामान पनि  खरानी भएको छ । 

ठेकेदारको सामानबारे प्रष्ट पार्दै स्रोत भन्छ, ‘सामान आए पनि रेकर्डमा जनाउन बाँकी थियो । बुट र सब बुट बुझाइसकेको थियो तर कम्प्युटरमा जनाउन बाँकी देखिन्छ ।’ अरु कतिपय सामानको गुणस्तर रिपोर्ट गुणतस्तर तथा नापतौल विभागबाट आउन बाँकी भएकाले ठेकेदारले बुझाउन भ्याएको थिएन ।

उक्त घटनाक्रममा तीन वर्षदेखि एउटै मान्छे भण्डार प्रमुख हुनुलाई पनि रहस्यमय ठानिएको छ । त्यसैगरी एउटै मान्छे लेखा प्रमुख भएर राईंदाईं गर्नुलाई पनि शंकाको दृष्टिकोणले हेरिएको छ ।

मुख्यालयको प्रबन्ध महाशाखामा पूर्वप्रधानमन्त्री शेरबहादुर देउवाका पीए भानु देउवाका बहिनी–ज्वाइँ एसएसपी दीपेन्द्र कुँवरको तीन वर्षसम्म लगातार मुकाम थियो । गत मंसिरमै ‘स्टोर इन’ गरिएका जाडोको सामान चैतको गर्मीसम्म किन वितरण नगरिएको भनेर प्रश्न गरिएको छ ।

जिम्मेवारीको हिसाबले भण्डार महाशाखाका हाकिम एसएसपी सुधीरजंग थापा हुन् । तर,दरबन्दी त्यहाँ भए पनि उनलाई राष्ट्रिय सशस्त्र प्रहरी बल प्रशिक्षण प्रतिष्ठान (एकेडेमी) मा लामो समयदेखि काज खटाइएको थियो । थापाको अनुपस्थितिमा भण्डारको काम लेखा समूहका एसपी राजेन्द्र श्रेष्ठले चलाउँदै आएका छन् । दरबन्दीका हाकिमलाई काजसरुवा, जाडोको सामान चैत मसान्तसम्म भण्डारणलगायत घटनाक्रमले पनि ‘एक्कासी लागेको’ आगोमा शंकाको आधार थपिएको हो ।

यसअघि कोषराज वन्त आइजी हुँदा हल्चोकको भण्डारमै आगो झोसिएको थियो । त्यतिबेला पनि अहिलेकै जस्तो विद्युत सर्टलाई दोष लगाइयो । त्यसबेला प्रबन्ध, लेखा तथा आर्थिक महाशाखा प्रमुख थिए अभिकुमार खत्री,जो अहिले ५ नम्बर बाहिनी लुम्बिनीका प्रमुख छन् ।