स्कुल बसमा लगाइएको आगो नियन्त्रणमा, अनुसन्धान जारी

चितवनको भरतपुरस्थित स्कुल बसमा लगाइएको आगो नियन्त्रणमा आएको छ । 

भरतपुर महानगरपालिका–२०, दद्रेनीस्थित स्मल हेभन स्कुल कल्याणपुरको बसमा आज बिहान सवा ८ बजे अज्ञात समूहले आगजनी गरेको थियो । विद्यार्थी लिन जानेक्रममा बागमती प्रदेश ०६ ००१ क ००४५ नम्बरको स्कुल बसका चालक र सहचालकलाई बाहिर निकालि पेट्रोल छर्किएर आगो लगाइएको थियो ।  

जिल्ला प्रहरी कार्यालय, चितवनका प्रवक्ता डिएसपी भेषराज रिजालले आगो नियन्त्रणमा आएको जानकारी दिएका छन् । उनका अनुसार बस जलेर पूर्ण रुपमा नष्ट भएपनि मानवीय क्षति भने भएको छैन । 

डिएसपी रिजालले भने, ‘बिहान विद्यार्थी लिन जानेक्रममा बसमा सवार चालक र सहचालकलाई बाहिर निकालेर अज्ञात समूहले आगजनी गरेको हो । बसमा कोही पनि नभएकोले मानवीय क्षति भने भएको छैन ।’

उनले थपे, ‘स्थानीय बासिन्दा र दमकलको सहायतामा हामीले आगो पूर्ण रुपमा नियन्त्रणमा लिइसकेका छौं । आगजनीमा संलग्न फरार व्यक्तिहरुको खोजी र घटनाबारे थप अनुसन्धान भइरहेको छ ।’