भीरबाट कार खस्यो, दुई जनाको मृत्यु

कान्तिराजपथ हुँदै ललितपुरबाट हेटौँडातर्फ गइरहेको कार दुर्घटनामा दुई जनाको ज्यान गएको छ । मकवानपुरको बकैया गाउँपालिका वडा नम्बर १२ स्थित चौतार नजिकैको भीरबाट खस्दा दुई जनाको निधन भएको छ ।

दुर्घटनामा रौतहटको मौलापुर नगरपालिका–६ बस्ने १७ वर्षीय बिबेक शाह र मकवानपुरको बकैया गाउँपालिका वडा नम्बर–१२ का ६५ वर्षीय प्रेमबहादुर ब्लोनको ज्यान गएको मकवानपुरका प्रहरी प्रवक्ता डिएसपी लक्ष्मी भण्डारीले बताए । सोही कारमा यात्रारत बाराको निजगढ नगरपालिका–६ बस्ने ३० वर्षीय सन्दिप शाह गम्भीर घाइते छन् । 

ललितपुरबाट हेटौंडातर्फ जाँदै गरेको ग.३ च ९४७५ नम्बरको टाटा कार सडकबाट पाँच सय मीटर तल खसेको छ । प्रहरी र स्थानीयले अचेत अवस्थामा तीनैजनालाई उद्धार गरेर हेटौंडास्थित अस्पताल पुर्याइएका दुबैजनालाई चिकित्सकले मृत घोषणा गरिएको हो ।