मिनीबस दुर्घटनामा दुईको निधन, एकको अवस्था गम्भीर

सुर्खेतको वीरेन्द्रनगरमा भएको मिनीबस दुर्घटनामा दुई जनाको ज्यान गएको छ । स्थानीय गौजनेस्थित दैलेखबाट सुर्खेततर्फ आउँदै गरेको कर्णाली प्रदेश ०२–००१ ख ०८५२ नम्बरको मिनीबस दुर्घटनामा परेको बताइएको छ ।

जिल्ला प्रहरी कार्यालय, सुर्खेतका डिएसपी वीरेन्द्रवीर विश्वकर्माका अनुसार दुर्घटनामा बर्दियाका शेरबहादुर खड्का र दैलेखका भीमसेन रानाको निधन भएको हो । २१ जना घाइते छन् । 

घाइते सबैको अस्पतालमा उपचार भइरहेको छ । तर एक जनाको अवस्था गम्भीर रहेको डिएसपी विश्वकर्माले बताए । उनले भने, ‘अहिले सबैको उपचार भइरहेको छ । तर, एक जनाको अवस्था गम्भीर छ ।’

दुर्घटना जीर्ण सडकका कारण भएको प्रहरीको प्रारम्भिक अनुमान छ । यद्यपि,  यससम्बन्धमा अनुसन्धान जारी छ ।