भाटभटेनीमा एक अर्बको चिस्यान केन्द्र, उमेश श्रेष्ठलगायत साझेदार

भाटभटेनी सुपरस्टोरका अध्यक्ष तथा प्रबन्ध निर्देशक मीनबहादुर गुरुङको नयाँ परियोजनामा पूर्वमन्त्री उमेश श्रेष्ठलगायत जोडिएका छन् । चितवनमा बनाउन लागिएको चिस्यान केन्द्र (कोल्ड स्टोरेज) मा गुरुङ, श्रेष्ठ,आशिष उपाध्याय, किरण श्रेष्ठलगायतको लगानी रहने बताइएको छ ।

चितवनको रत्ननगर नगरपालिकामा बन्ने उक्त केन्द्रमा एक अर्ब रुपैयाँ लगानी हुने छ । आज  शिलान्यास गरिएको उक्त स्थानमा भाटभटेनी सुपरस्टोर पनि बन्दैछ ।

 

चितवनपछि जनकपुर, भैरहवा,नेपालगञ्ज र इटहरीमा पनि १० हजार मेट्रिक टन क्षमताका शीतभण्डार निर्माण गर्ने योजना छ ।

पूर्वपश्चिम राजमार्गसँग जोडिएको सात बिघा जमिनमा सुपर मार्केटसहितको ‘मल्टी चेम्बर ह्युमिडिफायर कोल्ड स्टोर’ निर्माण गर्न लागिएको हो । चितवनपछि जनकपुर, भैरहवा,नेपालगञ्ज र इटहरीमा पनि १० हजार मेट्रिक टन क्षमताका शीतभण्डार निर्माण गर्ने योजना छ । कपिलवस्तुमा खोलिएको यसअघिको ‘एग्रिवस्तु प्रालि’ लाई मर्ज गरेर चितवनमा नयाँ स्टोरेजको शिलान्यास गरिएको हो ।

एग्रिवस्तुका प्रबन्ध निर्देशक आशिष उपाध्याय काँग्रेस नेता तथा पूर्वमन्त्री एवम् भारतका लागि राजदूत दीपकुमार उपाध्यायका छोरा हुन् । उमेश यसअघि शेरबहादुर देउवा मन्त्रिमण्डलमा राज्यमन्त्री थिए । किरण राष्ट्रिय वाणिज्य बैंकको प्रमुख कार्यकारी अधिकृतबाट हालै अवकाशप्राप्त बैंकर हुन् ।