परीक्षा केन्द्रबाट समातिएका नक्कली प्रहरी परीक्षार्थीलाई अदालत लगिँदै

प्रहरी जवान (जनपद) को लिखित परीक्षा दिँदै गर्दा पक्राउ परेका नक्कली परीक्षार्थीहरुलाई आज अदालतमा उपस्थित गराइने भएको छ । पक्राउ परेका ६ जनालाई म्याद थपका लागि आज अदालतमा उपस्थित गराउन लागिएको हो ।

उनीहरुविरुद्ध लोकसेवा आयोग ऐन, २०७९ को परिच्छेद ६ को दफा ४१ को उपदफा (घ) बमोजिमको कसूरमा मुध्दा चलाइने जिल्ला प्रहरी परिसर, काठमाडौंका प्रवक्ता प्रहरी उपरीक्षक (एसपी) नवराज अधिकारीले बताए । सो उपदफामा अर्काको नाममा परीक्षा दिएमा वा दिन लगाएमा पाँच वर्षसम्म लोकसेवाबाट लिइने परीक्षामा उम्मेदवार हुन रोक लगाउने व्यवस्था छ । 

त्यस्तै, ५० हजारदेखि एक लाख रुपैयाँसम्म जरिवाना वा ६ महिनासम्म कैद हुने ऐनमा उल्लेख छ । हिजो विभिन्न स्थानमा सञ्चालित परीक्षा केन्द्रबाट ६ जना नक्कली परीक्षार्थी पक्राउ परेका थिए । ललितपुरको धापाखेल बस्ने २२ वर्षीय अभिषेक शाही, कञ्चनपुरको पुनर्वास नगरपालिका १ का २४ वर्षीय ईशाक तामाङ्ग, काठमाडौंको स्वयम्भु बस्ने १७ वर्षीया तृप्ती सन्दास, मित्रनगर बस्ने २२ वर्षीय पारस बुढा, कीर्तिपुर बस्ने २० वर्षीय रविन्द्र महरा र मित्रनगर बस्ने २१ वर्षीय दिनेश चन्दलाई प्रहरीले नियन्त्रणमा लिएको हो । 

प्रहरी वृत्त, गौशालाको टोलीले दुई, बानेश्वरको टोलीले तीन र सिंहदरबारको टोलीले एक जनालाई समातेको जनाइएको छ । प्रहरीका अनुसार अभिषेक दर्ता नम्बर १३१२७९ भएका रित शाही, ईशाक दर्ता नम्बर १३११२६ भएका हिक्मतबहादुर थापा, तृप्ती दर्ता नम्बर १३२८७८ भएकी शर्मिला शाही, पारस रोशन खत्री, रविन्द्र सबिन महरा र दिनेश प्रदिप बस्यालको नाममा परीक्षा दिन आएका थिए ।