सुरक्षा प्रमुखको हुलै चितवन चलान

चार वटै सुरक्षा अंगका हाकिमसहित १५ जनाको टोली  चितवनतर्फ लागेको छ । आज दिउँसो नेपाली सेनाको स्काई ट्रक एनए ०६४ मा टोली काठमाडौँबाट भरतपुरतर्फ प्रस्थान गरेको हो । 

उक्त टोलीमा गृहसचिव एकनारायण अर्याल,नेपाली सेनाका रथी अशोकराज सिग्देल,नेपाल प्रहरीका आइजीपी वसन्त कुँवर, सशस्त्रका आइजीपी राजु अर्याल,मुख्य अनुसन्धान निर्देशक हुतराज थापालगायत छन् । 

चितवन प्रस्थान गर्नुअघि गृह सचिव र सुरक्षा निकायका प्रमुखहरु गृहमन्त्री रवि लामिछानेको औपचारिक बिदाई समारोहमा सरिक भएका थिए । विदाईलगत्तै उनीहरु चितवन उडेका हुन् । 

त्यसअघि बिहान उनीहरुले खुमलटार पुगेर प्रधानमन्त्री पुष्पकमल दाहाल प्रचण्डसँग पनि भेटवार्ता गरेका थिए । भेटमा प्रधानमन्त्रीले गत शुक्रबार बिहान नारयणगढ–मुग्लिन सडकको सिमलतालमा खसेको पहिरोले बगाएर त्रिशुली नदीमा बेपत्ता बसका यात्रुको खोजी र उद्धारमा थप सक्रिय हुन निर्देशन दिएको बताइएको छ ।