प्रेमको बहानामा सुनको ओसारपसार

‘बिकनी किलर’ नामले परिचित अपराधी चार्ल्स शोभराजले धेरै वर्षअघि ‘नेपालको एयरपोर्टबाट सुन मात्र होइन, हात्ती नै छिराए पनि सुरक्षा संयन्त्रले पत्तो पाउदैन’ भनेका थिए । उनले भनेझैँ एक पाकिस्तानी महिला भ्लगरले नेपालको विमानस्थलबाट हात्ती चाँही होइन, सुन भने सजिलै ल्याएकी छन् ।

पाकिस्तानी तर दुबइमा बस्ने युवती एलिजा जामेली टिकटक र यूटुबमा निकै चर्चित छन् । केही वर्ष पहिले टिकटकको माध्यमबाटै उनको भेट नेपाली युवक आयुष सिंह ठकुरीसँग भेट भयो । आयुष पनि टिकटक र यूटुबमा चर्चित नै हुन् । 

सामाजिक सञ्जालबाट जोडिए दुई जनाबीच प्रेम बस्यो । त्यसपछि एलिजा नेपाल आएर आयुषलाई भेट्न थालिन् । आयुष पनि एलिजालाई भेट्न दुबई पुगेको उनको भ्लगहरुमा देख्न सकिन्छ । 

सुन्दा / हेर्दा यो एउटा रोमान्टिक चलचित्रको कथा जस्तै लाग्छ । तर यतिबेला भने यो जोडी सुन तस्करी गरेको भन्दै विवादमा तानिएका छन् ।

यस्तो छ घटनाक्रम

गतसाता एलिजा आयुषलाई भेट्न दुबईबाट नेपाल आइन् । आउँदा १० तोलाभन्दा बढी सुन पनि ल्याइन् । नेपालको कानुनअनुसार कसैले पनि विदेशबाट नेपाल आउँदा महिलाको हकमा ५० ग्राम र पुरुषको हकमा २५ ग्रामभन्दा बढी सुन ल्याउन पाईंदैन । तर एलिजाले ६ वटा सुनको बाला, एउटा ठूलो सिक्री र केही साना सिक्री गरी १० तोलाभन्दा बढी सुन भन्सार नतिरी ल्याइन् ।

दुबईबाट ल्याएको सुनको भिडियोको दृश्य एलिजाले भ्लगमा राखिन् । उनले यो दृश्य अन्जानमै राखेकी हुन् वा जानेरै ? त्यो भने उनै जानुन् । भ्लगमा दुबईबाट सुन ल्याउँदा सुरूमा डर लागेको तर त्रिभुवन अन्तर्राष्ट्रिय विमानस्थलमा कुनै चेकजाँच नभएको बताइन् ।

भिडियोमा एलिजाले सुन भित्र्याउन सफल भएकोमा आयुषका परिवारले खुशी मनाउँदै पालैपाले गहना समातेको देख्न सकिन्छ । यत्तिकैमा एलिजाले भनेकी छन्, ‘सुरुमा मलाई डर लागेको थियो, तर मैले यो सबै भित्र राखेकी थिएँ, कसैले थाहा पाएन ।’ 

भित्र भनेको कहाँ ? लगेजभित्र, ह्याण्ड क्यारीभित्र वा आफैले लगाएको कपडाभित्र ? यसबारे भने उनले केही भनेकी छैनन्। 

उता त्रिभुवन विमानस्थल भन्सार कार्यालयले भने प्राविधिक समस्याको कारण यस्ता घटना हुने गरेको जनाएको छ । एलिजाले भित्र्याएको सुनबारे आफूलाई केही थाहा नभएको भन्सार कार्यालयका प्रवक्ता गगनबहादुर विकले बताए । उनले जनआस्थासँग भने, ‘केही प्राविधिक समस्या भयो भने यस्तो हुन्छ,  उहाँको पनि चेकजाँच नभएको हुनसक्छ, नत्र त्यसरी उहाँले सुन पास गराउन त नसक्नुपर्ने हो ।’  

त्यसो त समग्रमा हेर्दा एक विदेशी युवती आफ्नो प्रेमी भेट्न नेपाल आएकी हुन् । तर उनले सजिलै भित्राएको सुनले नेपालको एक मात्र अन्तर्राष्ट्रिय विमानस्थलको सुरक्षा संयन्त्रमाथि गम्भीर प्रश्न उठाएको छ । 

रोचक त के छ भने, एलिजाका पुराना भिडियोको अध्ययन गर्दा उनी अहिलेसम्म दुबईदेखि नेपाल ५÷६ पटक आवतजावल गरिसकेकी छन् । यो बीचमा उनले कति सुन् भित्राइन् ? यसबारे सामाजिक सञ्जालमा टिकाटिप्पणी सुरु भएको छ । अहिले एलिजा र आयुषका शुभचिन्तहरुले नै प्रेमको नाममा सुन तस्करी गरेको भन्दै चर्को आलोचना गरिरहेका छन् ।