प्रहरी जवानद्वारा पटक पटक ‘बलात्कृत’ युवती माइतीघरको सडक छेउमा

बलात्कार आरोपितलाई अदालतले जोगाउन खोजेको भन्दै आन्दोलनरत जाजरकोटकी सराकुमारी शाही लगातार धर्नामा बसेकी छन् । गत असार २१ गतेदेखि राजधानीको माइतीघर मण्डलामा एकल प्रदर्शनरत उनले आज २५ औं दिन धर्नालाई निरन्तरता दिएकी हुन् ।

विवाहको प्रलोभन देखाउँदै प्रहरी जवान भुपेन्द्रसिंह ठगुन्नाले जबरजस्ती करणी गरेको उनको आरोप छ । जुनिचाँदी गाउँपालिका–९ की सराकुमारी अध्ययनको सिलसिलामा सुर्खेतको वीरेन्द्रनगर नगरपालिका–७ मा बस्दै आएकी थिइन् । 

सुर्खेत बहुमुखी क्याम्पसमा स्नातकोत्तर अध्ययनरत उनको टिकटकमार्फत भुपेन्द्रसँग चिनजान भएको बताइन्छ । त्यतिबेला भुपेन्द्रको ‘पोस्टिङ्ग’ सुर्खेतमै भएकाले उनीहरुको भौतिकरुपमा पनि भेटघाट हुन थाल्यो । प्रेम सम्बन्धमा रहेका दुबै ‘लिभिङ टुगेदर’ मा बसे । पछि भुपेन्द्र सरुवा भएकाले सर्वोच्च अदालतमा आए । सराकुमारी पनि निम्न माध्यमिक तहसम्म पढाउने शिक्षक लाइसेन्सको परीक्षा दिन काठमाडौं आइन् ।

सराकुमारीका अनुसार त्यसपछि उनी भुपेन्द्रकै कोठामा बसिन् । सोक्रममा भूपेन्द्रले ‘विवाह गर्छु’ भन्दै पटक–पटक शारीरिक सम्बन्ध राखेको र आफू गर्भवती भएको उनको भनाइ छ । तर, त्यसपछि उनीहरुको सम्बन्ध राम्रो हुन सकेन । भुपेन्द्रको कुटाइबाट आफ्नो गर्भ खेर गएको सराकुमारीको आरोप छ । 

आफूसँग शारीरिक सम्बन्ध राखेर छाडिदिएपछि सराकुमारीले सुर्खेत जिल्ला अदालतमा ‘बलात्कार’ मुद्दा दायर गरिन् । न्यायाधीश मनोजकुमार श्रेष्ठको इजलासले भुपेन्द्रलाई धरौटीमा रिहा गर्न आदेश दियो । जिल्लाको आदेशविरुद्ध उनले उच्च अदालत, पाटनमा रिट दायर गरिन् । उच्चले पनि भुपेन्द्रलाई पुर्पक्षका लागि थुनामा पठाउन नमिल्ने भन्दै मिसिल सर्वोच्च पठाएको छ ।

शाहीले ‘प्रेम सम्बन्धमा पारी विवाहको आश्वासन दिई बलात्कार गर्ने निलम्बित प्रहरी जवान भुपेन्द्र सिंह ठगुन्नालाई कारबाही गर’, ‘पटकपटक भ्रुण हत्या गराई म मेरो बच्चामाथि अन्याय गर्ने अपराधीलाई कानुनबमोजिम सजाय गर’, ‘अदालतको इजलासमा नै म पीडितमाथि अपशब्द प्रयोग र धम्की दिने सुर्खेत जिल्ला अदालतको न्यायाधीश मनोजकुमार श्रेष्ठलाई अनुसन्धानगरी कारबाही गर’, लगायत माग राखेकी छन् ।

यो पनि...

प्रहरी जवानबाट ‘बलात्कृत’ युवती दुई सातादेखि धर्नामा