चार तले पक्की घरमा आगलागी, करोडाैंको क्षति

भक्तपुरको मध्यपुर थिमीस्थित एक घरमा आगलागी हुँदा करोडौंको धनमाल नष्ट भएको छ । गएराति मध्यपुर थिमी नगरपालिका–३, कौशलटार अमिनिटी स्कुलनजिकै रहेको शंकर कटुवालको चार तले पक्की घरमा आगलागी हुँदा दुई करोड ६० लाख रुपैयाँ बराबरको क्षति पुगेको बताइएको छ ।

बिहीबार राति सवा ९ बजे घरको भुईं तलामा रहेको नासा ईन्टेरियर कम्पनी नामको आल्मुनियम र फर्निचर फ्याक्ट्रीमा अचानक करेन्ट सर्ट भई आगलागी भएको प्रत्यक्षदर्शीको भनाई छ ।

लगत्तै प्रहरी वृत्त थिमी र प्रहरी प्रभाग बालकोटबाट खटिएको टोलीसहित स्थानीय र पाँच वटा दमकलको सहयोगमा झण्डै डेढ घण्टापछि आगो नियन्त्रणमा लिइएको थियो । घटनाबारे थप अनुसन्धान भइरहेको प्रहरीले बताएको छ ।