जाजरकोट र बझाङमा पहिरो, सातको मृत्यु

जाजरकोट र बझाङमा गएको पहिरोमा सात जनाको मृत्यु भएको छ । पहिरोल घर पुरिँदा जाजरकोटमा तीन र बझाङमा चार जनाको निधन भएको बताइएको छ ।

जाजरकोटको नलगाड नगरपालिका–२ माझगाउँमा एकै परिवारका तीन जनाको मृत्यु भएको छ । भूकम्पपछि बस्दै आएको टहरो पहिरोले पुरिँदा ४२ वर्षीय लालबहादुर परियार, ३४ वर्षीया मनिषा र २ वर्षका शिवम परियारको ज्यान गएको हो । 

उता बझाङको बुंगल नगरपालिका–१०, टुमेडामा पहिरोले पुरिएर गएराति एकै परिवारका चार जनाको मृत्यु भएको छ । प्रहरीले आज बिहान काली धामी, गोल्की धामी, आसिका धामी र लक्ष्मी धामीको शव निकालेको छ ।

बिरा धामीको घरभित्र रहेका परिवारका अन्य पाँच जना सदस्यको उद्धार गरिएको छ ।