चाइना साउदर्नले १० वटा बोइङ ७८७ बेच्दै,एअर इण्डिया बाटो हेर्दै

चीनको चाइना साउदर्न एअरलाइन्सले आफ्ना १० वटा बोइङ ७८७–८ ड्रिमलाइनर विमान बिक्रीमा राखेको छ । यता,भारतको एअर इण्डियाले भने त्यस्तै विमानको खोजीमा रहेको संकेत दिएको छ ।

चाइना साउदर्नले आफ्नो उडान पुनर्संरचनाको क्रममा ती विमान बिक्रीमा राखिएको जनाएको छ । कम्पनीले जारी गरेको कम्प्रिहेन्सिभ रिक्वेस्ट फर प्रोपोजल्स (आरएफपी) मा ती विमानसँगै दुई वटा जगेडा इञ्जिन पनि रहेको फुल प्याकेज उल्लेख छ ।

चाइना साउदर्नले मे २०१३ देखि उडानमा रहेका बी २७२५ सिरिजका १० विमानलाई सन् २०२५ देखि २०२६ सम्म बिक्री गरिसक्ने जनाएको छ । यसका लागि सोमबारसम्म आवेदन गरिएका कम्पनीलाई भोलिसम्म विमानको समग्र प्राविधिक विवरण उपलब्ध गराउने प्राप्त समाचारमा उल्लेख छ ।

यता भारतमा टाटा कम्पनीको स्वामित्वमा रहेको एअर इण्डिया आफूलाई थप परिष्कृत र आधुनिक तुल्याउने रणनीतिका साथ अघि बढेको छ ।

चाइना साउदर्नले बिक्रीमा राखेका ती विमान सम्भवतः एअर इण्डियाको पछिल्लो रणनीतिसँग मेल खाने एभिएसन ए टु जेड डट कमले जनाएको छ । चाइना साउदर्नका ती विमान करिब ११ वर्ष मात्रै पुराना भएकाले भारतीय विमान कम्पनीले आफूलाई आधुनिक बनाउने मार्गमा सहयोगी हुने भाव्य बेलानीले विश्लेषण गरेका छन् ।