भारतले स्टाण्डर्ड तोकेपछि यताको स्यानिटरी प्याड निर्यात ठप्प

भारतले सबै खालका स्यानिटरी प्याड आयातमा गुणस्तर प्रमाणपत्र अनिवार्य गरेपछि नेपालबाट त्यता हुँदै आएको निर्यात ठप्पको अवस्थामा पुग्ने भएको छ । आगामी पुस १७ गते अर्थात् नयाँ वर्ष २०२५ को जनवरी १ देखि भारतको ब्यूरो अफ इन्डियन स्ट्यान्डर्ड –बीआईएसले विदेशबाट आयात हुने सबै स्यानिटरी प्याडलाई गुणस्तर प्रमाणपत्र अनिवार्य गरेको छ । 

अक्टोबर १ देखि भारतमा अन्य मुलुकबाट आयात हुने प्याड र बेबी डाइपरमा बीआईएस अनिवार्य गरेपछि नेपालबाट निर्यात हुँदै आएको प्याड र बेबी डाइपरसमेत रोकिएको थियो । तर भारतले २३ अक्टोबरपछि खुल्ला गरेको उक्त प्रावधानलाई आगामी १ तारिखदेखि कार्यान्वयनमा ल्याउन लागेको हो ।

नेपालका त्यस्ता उद्योगले भारतको बीआईएसमा गुणस्तर प्रमाणपत्रको निम्ति आवेदन दर्ता गरेको धेरै भइसक्दा पनि भारतले आवश्यक प्रक्रिया अघि बढाएको छैन । नेपालबाट करोडौं मूल्यका त्यस्ता सामाग्री भारत निर्यात हुने गरेको थियो ।