दक्षिण एसियाली व्यापार नीति पुनःविचार गर्नैपर्ने अवस्थामा

नेपाल उद्योग वाणिज्य महासंघका अध्यक्ष चन्द्रप्रसाद ढकालले दक्षिण एसियाले आफ्नो व्यापार नीति पुनःविचार गर्नुपर्ने बताएका छन् । आज १५ औं दक्षिण एसियाली आर्थिक शिखर सम्मेलनमा सम्बोधन गर्दै उनले यस्तो धारणा राखेका हुन् । 

अध्यक्ष ढकालले दक्षिण एसिया संसारकै तीव्र आर्थिक वृद्धिका क्षेत्रहरुमध्ये एक भएपनि व्यापार र लगानी प्रवाहका हिसाबले सबैभन्दा कम जोडिएको क्षेत्र रहेको बताए । यसैले, कमजोर क्षेत्रहरुको संरक्षण गर्दै हरित र समावेशी विकासलाई प्रोत्साहन गर्नुपर्ने नीति ल्याउनुपर्ने उनको तर्क छ ।  

उनले क्षेत्रीय आर्थिक एकीकरणका लागि पछिल्लो दशकमा ठोस प्रगाति नभएको गुनासो गर्दै यस क्षेत्रमा दक्षिण एसियाली स्वतन्त्र व्यापार क्षेत्र (साफ्टा) अन्तर्गत न्यून भन्सार महसुलले दबाब सिर्जना गरेको बताए । विशेष गरी नेपालजस्ता साना अर्थतन्त्रको स्थानीय उद्योग संरक्षण र प्रवद्र्धन गर्न गाह्रो परेको अध्यक्ष ढकालको ठहर छ ।

उनले साफ्टाले दक्षिण एसियाली क्षेत्रभित्र व्यापार र लगानी प्रवर्द्धन गर्न सहयोग गर्नुपर्नेमा जोड दिदैँ नेपालको जलविद्युतजस्ता नवीकरणीय ऊर्जा क्षेत्रमा रहेको विशाल सम्भावनालाई उजागर गर्दै साझा ऊर्जा ग्रिडले सबै देशलाई स्वच्छ ऊर्जा स्रोतमा पहुँच र जीवाशम इन्धनमा निर्भरता कम गर्न सहयोग पुर्याउनसक्ने बताए । 

दक्षिण एसियाली क्षेत्रले जलवायु परिर्वतनको असर भोग्नु परेपनि अनुकुलन र न्यूनीकरणका लागि स्रोत सीमित रहेको र जलवायु योजना कार्यान्वयनका लागि सन् २०३० सम्म वार्षिक दुई सय अर्ब अमेरिकी डलर आवश्यक पर्ने अनुमान गरिएको उनले जानकारी दिए ।