महिला सचिवलाई जुम्रा नमार्न उर्दी

आफूलाई जेनजीको लिडर दावी गर्ने ‘हामी नेपाल’ का अध्यक्ष सुदन गुरुङ्गले महिला, बालबालिका तथा ज्येष्ठ नागरिक मन्त्रालयकी सचिव लक्ष्मीकुमारी बस्नेतलाई ‘जुम्रा मारेर र कुरा काटेर नबस्न’ निर्देशन दिएका छन् । भदौ २७ गते प्रधानमन्त्री सुशीला कार्कीको शपथ ग्रहणका लागि राष्ट्रपति कार्यालय पुगेका गुरुङ्गले महिला सचिव बस्नेतलाई त्यसो भनेका हुन् । 

आफूलाई ‘सवारी खोइ त ?’ भनी शुरुमै असन्तुष्टि पोखेका उनले शपथ ग्रहण सकेर निस्किने क्रममा महिला सचिवको अगाडि उभिएर ‘अब काम गर्ने, जुम्रा मारेर र कुरा काटेर बस्ने होइन’ भनेको स्रोत बताउँछ । स्रोतका अनुसार गुरुङ्गले त्यसो भनिरहँदा कानुन सचिव पाराश्वर ढुंगाना र कानुन आयोगका सचिव तथा वरिष्ठ अधिवक्ता टिकाराम भट्टराईकी श्रीमती इन्दिरा दाहाल छेउमै थिए । 

‘शपथ ग्रहणमा आउनेबित्तिकै उनले मलाई कारकेड खोइ भन्दै असन्तुष्टि पोखे । निस्किदाँखेरि महिला सचिवलाई काम गर्नु, जुम्रा मारेर र कुरा काटेर नबस्नु भनी उर्दी दिए’, स्रोतले भन्यो ।

(जनआस्था साप्ताहिकको असाेज ८ गते बुधबारको अंकमा प्रकाशित)