जेन जीको पहिले आन्दोलन हाइज्याक, अहिले ‘दल’

रुपन्देहीका हिराबहादुर सेती उर्फ किरण विकले ‘राष्ट्रिय जेन जी पार्टी नेपाल’ नामको दल दर्ताका लागि निर्वाचन आयोगमा निवेदन दिएका छन् । आफ्नो अध्यक्षतामा दल दर्ताका लागि उनले आयोगमा निवेदन दर्ता गराएको बताए ।

केन्द्रीय कार्यालय काठमाडौंको अनामनगरमा रहने दलको चुनाव चिन्ह ‘क्रस खुकुरी’ राखिएको छ । सम्भवतः तिहारपछि दल दर्ता हुने किरणले जानकारी दिए । जनआस्थासँगको कुराकानीमा उनले भने,‘निवेदन त दर्ता गरायौं, उहाँहरुले अध्ययन गर्न केही दिन लाग्छ भन्नुभएको छ । चुनाव चिन्हलाई लिएर सेनाले आपत्ति जनाउने हो कि भन्ने लागेको छ, हेरौं के हुन्छ ।’

आफूलाई शहरी विकासको जानकार भन्ने विक चलचित्र क्षेत्रमा पनि संलग्न छन् । यसअघि आयोगले कात्तिक १७ गतेलाई तोकिएको उपनिर्वाचनमा रुपन्देही–३ मा उम्मेदवारी घोषणा गरेका थिए । 

तर भदौ २३ गतेको जेन जी प्रदर्शन र २४ गतेको विध्वंशले उपनिर्वाचन रद्द भएपछि उनले सुशीला कार्की नेतृत्वको अन्तरिम सरकारमा आफूलाई मन्त्री बनाउनुपर्ने माग राख्दै आएका थिए । उक्त माग पूरा नभएपछि अहिले नयाँ दल गठन गरेका हुन् ।