माओवादीसँग मिल्दै नेकपा एस, ओलीले जासिस गरेको ठहर
नेकपा एकीकृत समाजवादीका उपाध्यक्ष जगन्नाथ खतिवडाले माओवादी केन्द्रसँग एकता प्रक्रिया अन्तिम चरणमा पुगेको बताएका छन् ।
जारी केन्द्रीय कमिटी बैठकमा पार्टी एकतालाई लिएर नेताहरू दुई धारमा देखिएका बेला उनको यस्तो भनाइ आएको हो । माओवादीसँग एकता गर्दै नयाँ समाजवादी पार्टी बनाउनका लागि पूर्ण विश्वासका साथ गृहकार्य अघि बढेको खतिवडाको भनाइ छ ।
बैठकले एकताको पक्षमा निर्णय लिने दाबीसमेत उनले गरेका छन् । माओवादीले 'माओवाद' छोड्ने र मार्गदर्शक सिद्धान्त 'माक्र्सवाद-लेनिनवाद' बनाउने बिन्दुमा सहमति जुटेको उनले खुलाए ।
यो सैद्धान्तिक विषयमा समानता स्थापित भैसकेकाले असन्तुष्ट हुनुपर्ने कारण केही नरहेको भन्दै उनले अब सम्मानित नेता झलनाथ खनाल लगायतले बिमति राखे पनि केन्द्रीय कमिटीले एकताको पक्षमा निर्णय गर्ने स्पष्ट पारे ।
'बैठकमा सम्मानित नेता खनालले राख्नुभएको सुझाव हो, एकता नगरौँ । गरेर राम्रो हुँदैन भन्ने सुझाव उहाँको हो । बैठक भनेकै राय, सल्लाह, सुझाव दिनका लागि गरिने हो । निर्णय एकताको पक्षमा हुन्छ । र एकताको प्रक्रियामा तत्काल अघि बढ्छौँ', उपाध्यक्ष खतिवडाले भने, 'माओवाद उसले छोड्ने भयो, माओवादीलाई मार्गदर्शक सिद्धान्तका रुमपा माक्र्सवाद लेनिनवादलाई मान्छ । हामी पनि त्यसलाई मान्छौँ । धेरै कुराहरु हामीले छलफल गरेर डकुमेण्ट आदान प्रदान गरेर मिलाइसकेका छौँ ।'
एमाले अध्यक्ष केपी शर्मा ओलीको 'पुरानै घर फर्किनुस्' भन्ने आह्वानलाई उनले पार्टी एकता भाँड्ने जासिसको संज्ञा दिएका छन् । 'केपी ओलीको आह्वान यो साजिस हो । हाम्रो एकता भाँड्न प्रयास गरेको मात्रै हो । उहाँ एकताको लागि कहिल्यै हुनुहुन्न', उनले भने ।
एकताको प्रक्रिया सकिएपछि निश्चित विधिबाट नेतृत्व पुस्तान्तरण हुने पनि खतिवडाले प्रष्ट्याएका छन् ।
टिप्पणीहरू