यसरी चुनिँदैछन् एमालेका २१ सय महाधिवेशन प्रतिनिधि

नेकपा एमालेको आगामी महाधिवेशनमा करिब २१ सय प्रतिनिधि सहभागी हुने भएका छन्। पार्टीले प्रतिनिधि छनोटका लागि नयाँ संरचना र मापदण्ड तय गरेको जानकारी दिइएको छ।

आज बसेको सचिवालय बैठकले प्रतिनिधिसभा निर्वाचन क्षेत्रका आधारमा प्रत्येक १२ सय सदस्यमा दुई जना खुला र एक जना महिला प्रतिनिधि रहनेछन्। त्यसपछि ४० वर्ष उमेर मुनिका एक जना युवा प्रतिनिधि र प्रत्येक आठ सय सदस्यमा थप एक जना महिला प्रतिनिधि चयन गरिनेछ। प्रतिनिधि चयनको क्रममा दोस्रो र तेस्रो खुला र चौथो महिला रहने व्यवस्था गरिएको छ।

दलित कोटामा हरेक पाँच सय सदस्यका लागि एक जना प्रतिनिधि रहनेछन्। त्यस्तै, ट्रेड युनियनबाट प्रदेशगत २ः५ अनुपातमा ७ जना, जनसङ्गठनबाट ५ जना, महासङ्घीय संगठनबाट ७ जना, र प्रवासी कमिटीबाट महादेशगत ५ जना (३ः२ अनुपातमा) प्रतिनिधित्व हुने व्यवस्था छ। प्रदेश कमिटीमा ३ः२ अनुपातमा प्रतिनिधि रहनेछन्।

विभिन्न विभाग र कार्यालयहरूबाट पनि एक–एक जना प्रतिनिधि रहनेछन्। पदेन सदस्यका रूपमा केन्द्रीय आयोग र समितिबाट ४६४ जना रहने जनाइएको छ।

तीमध्ये केन्द्रीय निर्वाचन आयोगबाट ३५४, अनुशासन आयोगबाट २९, लेखा आयोगबाट ३०, निर्वाचन आयोगबाट २५ र सल्लाहकार समितिबाट २५ जना पदेन सदस्य रहने व्यवस्था छ ।

पार्टीका ६ लाख ६७ हजार ६३० सदस्यमध्येबाट आगामी महाधिवेशनका लागि प्रतिनिधिको अनुमानित संख्या करिब एक हजार ८५६ हुनेछ। मनोनयनका लागि थप ५ प्रतिशत प्रतिनिधि मिलाएर करिब २,१०० जना सहभागी हुने पार्टीको अनुमान छ ।