लिङ्देनमाथि दबाब,राणाको कस्तो होला प्रभाव ?

राष्ट्रिय प्रजातन्त्र पार्टीका महामन्त्री धवलसमशेर राणाले आफू निकट पदाधिकारी र केन्द्रीय सदस्यको छुट्टै भेला बोलाएका छन् । मङ्सिरभित्र महाधिवेशन गराउन अध्यक्ष राजेन्द्र लिङ्देनमाथि दबाब दिने उद्धेश्यसहित नेताहरु दिउँसो बालुवाटारस्थित नेपाल हाउसमा जुट्न लागेका हुन् । 

जेनजी प्रदर्शनपछि सिर्जित परिस्थितिलाई मध्यनजर गर्दै महामन्त्री राणा समूहले मंसिर १७ गते महाधिवेशन र पार्टी पुर्नगठनको माग राख्दै आएको छ । तर,अध्यक्ष लिङ्देनले भने जिल्ला र प्रदेश अधिवेशनकै लागि मंसिर मसान्तसम्मको समय तोकिएको बताउँदै त्यसअघि केन्द्रीय महाधिवेशन गर्न नसकिने जनाउ दिएकाे अवस्था छ । 

गत माघयता बस्न नसकेको केन्द्रीय समिति बैठक आगामी कात्तिक २७ र २८ गते बस्दैछ । बैठक मिति नजिकिदै गर्दा महामन्त्री राणा पक्षधरहरु सक्रिय बनेका हुन् । केन्द्रीय समितिको बैठकबाट मंसिरभित्रै महाधिवेशन गर्ने निर्णय पारित गराउने राणा समूहको तयारी छ । लिङ्देनले आफू निकट नेताहरुलाई कारवाही गरेपछि महामन्त्री राणाले नेतृत्वको चर्को आलोचना गर्दै आएको देखिन्छ । राणा आगामी महाधिवेशनमा अध्यक्षको उम्मेद्वार हुन् ।