प्रचण्डले माओवाद त्यागेपछि पूर्व कमाण्डर आक्रोशित

नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले माओवादी विचार त्यागेर गरिएको पार्टी एकता दिगो नहुने भन्दै तत्कालीन जनमुक्ति सेनाका एक कमाण्डरले पुनर्विचार गर्न सुझाव दिएका छन्। रोल्पा घर भएका र हाल घाइते विजय केसी विकल्पले प्रचण्डलाई खुला पत्र लेख्दै नेकपा (एकीकृत समाजवादी)सँगको एकता टिकाउ नहुने दाबीसहित होसमा आउन सल्लाह दिएका छन्।

दशवर्षे जनयुद्धमा सक्रिय भूमिका निभाएका केसीले प्रश्न गरेका छन् कि माधवकुमार नेपालहरूले माओवादी जनयुद्धको विचार, राजनीति र आदर्शलाई निशर्त स्वीकार गरेका हुन् त? ‘आम माओवादी कार्यकर्ता र जनताहरूको सहमति कसरी प्राप्त होला?’ उनका प्रश्न छन्। उनका सुझाव छ — ‘विचार त गर्नु भएको होला, आफ्नै परिवार मिलाउन नसक्दा त कति गाह्रो छ, अरूलाई लिएर मिल्छौं भन्नु भरपर्दो देखिँदैन, सायद कमै टिकाउ होला।’

विभिन्न एम्बुसको कमाण्ड सम्हालेका केसीले जनयुद्धकालमा प्रचण्डलाई दिएको घडी पनि सम्झिएका छन्। उनले लेखेका छन् ः ‘डोटीको घन्टेश्वरमा मेरो कमाण्डमा गरिएको सफल गाडी एम्बुसबाट प्राप्त घडी अध्यक्षलाई युद्धमैदानको चिनो हुनेछ भनेर तत्कालीन ब्युरो इञ्चार्ज कमरेड प्रभाकरण रहेको क्षेत्र सेती–महाकालीबाट तत्कालीन ब्रिगेड कमिसार कमरेड उत्तम हुँदा कमाण्डर विविधको हातबाट हेड क्वार्टरलाई सम्झदा गौरव लागेको थियो। युद्ध सामग्री कब्जा गर्दा सँगै आएको त्यो घडी सायद पाउनु भयो होला।’

माओवादी ध्रुवीकरणको वकालत गर्दै आएका केसीले पत्रमार्फत् प्रचण्डलाई खारा मोर्चाको स्मरण गराएका छन्। उनले भनेका छन् ः ‘खारा मोर्चाको शिक्षा र अनुभवले सिङ्गो माओवादी युद्धलाई फरक ढंगले अघि बढ्न बाध्य बनाएको थियो, जसको फिल्ड कमिसार कमरेड विप्लव हुनुहुन्थ्यो, कमाण्डर कमरेड पासाङ र सहकमाण्डर कमरेड प्रभाकर हुनुहुन्थ्यो। दुर्भाग्य आज यी चार जना युद्धका सारथी चार दिशातिर फर्किंदै हुनुहुन्छ, त्यसैले म यो खुला पत्र हजुरको नाममा लेख्दैछु।’

महान सपना बोकेर युद्धमा होमिएका आफू अहिले घाइते र निरिह जीवन बिताइरहेको केसीले अवगत गराएका छन्। उनले लेखेका छन् ः ‘म घरको कान्छो छोरा हुँ, खान नपुगेर युद्धमा हिँडेको मान्छे होइन। बुढो घर छ गाउँमा, ढल्दै गरेको प्रत्यक्ष रूपमा देख्दैछु, टेकोसो राख्न काठ किन्ने पैसा छैन — यो जीवन हजुरले बनाइदिएको होइन र?’

केसीले पत्रको अन्त्यमा जनयुद्धमा बाँडिएको सपना अझै पूरा नभएको भन्दै त्यो पूरा गर्न प्रचण्डको ध्यानाकर्षण गराएका छन्। प्रचण्डकै कारण आफूहरू घाइते र बेसहारा बनेको भन्दै उनले भनेका छन् ः ‘हामीलाई घरबारविहीन बनाउनुभयो, हामीलाई माओवादी बनाएर अर्कोतिर लग्नुभयो, हामीलाई अलग बनाउनुभयो... यस्ता गुनासो उठाउन पाइन्छ कि छैन हामीलाई? कृपया, विनापूर्वाग्रह आफ्नो सन्तानको आवाजलाई सम्बोधन गर्ने प्रयास गर्नुहोला।’