कुलमानमाथि एमाले महासचिवले उठाए ‘नैतिक प्रश्न’
नवगठित उज्यालो नेपाल पार्टीमा सक्रियता बढाउँदै लगिरहेका ऊर्जामन्त्री कुलमान घिसिङलाई लक्षित गर्दै नेकपा एमालेका महासचिव शंकर पोखरेलले नैतिक प्रश्न तेर्साएका छन् ।
प्रधानमन्त्री सुशीला कार्कीले घोषणा गरेको ‘गैरदलीय मन्त्रिमण्डल’ को मूलभावनासँग घिसिङको राजनीतिक सक्रियता मेल नखाने उनको भनाइ छ ।
नयाँ दल खोलेपछि पोखरेलले घिसिङको मन्त्री पदमै बसिरहने औचित्यमाथि नै नैतिक प्रश्न खडा भएको उल्लेख गरे । फेसबुकमा लेखेका छन्, ‘प्रधानमन्त्री सुशीला कार्कीले गैरदलीय सरकार बनाएको दाबी गर्नुहुन्छ। तर चुनावमा सहभागी हुनेगरी नयाँ दल घोषणा गरिसकेको व्यक्तिलाई मन्त्री पदमा राखिराख्नु उचित हुन्छ ?’
उनले प्रधानमन्त्रीको प्रतिबद्धता र घिसिङको पछिल्लो भूमिका परस्पर विरोधी भएको दाबी गरेका छन् । लेख्छन्, ‘यस्तो व्यक्ति मन्त्री पदमा बसिरहनु नैतिक दृष्टिले उपयुक्त छैन भने अविलम्ब बिदा गर्नुपर्छ।’
ऊर्जामन्त्री घिसिङ उज्यालो नेपाल पार्टीको केन्द्रीय समिति बैठकमा सहभागी भएको फोटो र भिडियो सार्वजनिक भएपछि उनको चर्को आलोचना भएको हो ।
टिप्पणीहरू