अदालतले तोकेको ३१ लाख नतिरी भागेका व्यक्ति फेरी अदालतमा

विभिन्न मुद्दामा अदालतले तोकेको ३१ लाख बढि जरिवाना नतिरी फरार रहेका एक युवक समातिएका छन् । बैदेशिक रोजगार तथा पटक-पटक बैंकिङ कसूर मुद्दामा उच्च अदालत पाटन र काठमाडौँ जिल्ला अदालतबाट ३१ लाख ४९ हजार रकम जरिवाना तोकिएको अभियुक्त हिजो पक्राउ परेका हुन् ।

पक्राउ पर्नेमा बाजुराको बूढीनन्दा नगरपालिका-१ घर भई हाल काठमाडौँको बूढानिलकण्ठ नगरपालिका-७ बस्ने ४४ बर्षीय बिष्णु बहादुर कार्की रहेको महानगरीय प्रहरी अपराध महाशाखाले जनाएको छ । उनीविरुद्ध जिल्ला अदालत काठमाडौँले २०६० पुस १० गते बैदेशिक रोजगारसम्बन्धी मुद्दामा तीन वर्ष कैद र दुई लाख ५० हजार जरिवानाका साथै बैकिङ कसूर मुद्दामा एक वर्ष कैद सजाय र एक लाख ५९ हजार जरिवाना तोकेको थियो ।

बैंकिङ कसूरको अर्को त्यस्तै मुद्धामा जिल्ला अदालतले नै एक वर्ष कैद सजाय र ३० हजार जरिवाना मागेको थियो । त्यस्तै, उच्च अदालत पाटनले २०७७ माघ ६ गते बैंकिङ कसूर मुद्धामा ७ दिन कैद र २७ लाख जरिवाना तोकेको थियो ।

तर, जरिवाना नतिरी फरार रहेका उनी हिजो पक्राउ परेका हुन् । उनलाई अपराध महाशाखाबाट खटिएको प्रहरीको बिशेष टोलीले बूढानिलकण्ठबाट पक्राउ गरी आवश्यक कारवाहीको लागि जिल्ला अदालत काठमाडौँ पठाएको छ ।

उनले विभिन्न ब्यक्तिहरुलाई एयरलाईन्समा पाईलटको जागिर लगाइदिने, डिमाण्ड ड्राफ्ट (डीडी) बनाईदिनेलगायत विभिन्न प्रलोभन देखाएर ठगी गरेकोसमेत देखिएकाले त्यसबारेमा समेत अनुसन्धान भैरहेको प्रहरीले जानकारी दिएको छ । प्रहरीले कार्कीबाट ठगिएको भए अपराध महाशाखामा सम्पर्कमा आउँन पनि भनेको छ ।