विवाहमा गएका १३ जना इनारमा खसेर अस्ताए

भारतमा विवाह समारोहमा गएका १३ जना अकस्मात इनारभित्र खस्दा उनीहरुको मृत्यु भएको छ ।

उत्तर प्रदेशको कुशिनगर जिल्लाको एउटा गाउँमा हिजो राति सो दुःखद घटना भएको हो । मृत्यु हुनेमा महिला र बालबालिका पनि छन् ।

अधिकारीहरुका अनुसार विवाह समारोहमा एउटा पुरानो इनारलाई छोपेको स्ल्याबमा महिला र बालबालिका बसेका थिए । उनीहरुको तौल धान्न नसकेर सो स्ल्याब भत्किदा त्यहाँ बसेका सबै जना इनारभित्र खसेका थिए । डुबेकालाई उद्दार गरी अस्पताल लगिए पनि अस्पतालले उनीहरुलाई तत्काल मृत घोषणा गरेको थियो ।

घटनामा अन्य दुई जना गम्भीर घाइते भएका छन् । दुर्घटनामा ज्यान गुमाएका पीडितको शोकमा डुबेका आफन्त विवाहको पहिरनमा अस्पताल पुगेका थिए । करिव १० बजे ५० देखि ६० महिला, युवती तथा बालबालिकाहरू विवाहमा मनाइने परम्पराअनुसार इनारमा पुगेका थिए ।