दुई छोरा मिली प्रेसर कुकरले हानेर बाबुको हत्या

कीर्तिपुरमा प्रेसर कुकरले हानेर छोराले आफ्नै बुबाको हत्या गरेका छन् । गएराति मादक पदार्थ सेवन गरेका दुई भाइले मिलेर ६५ वर्षीय बाबुको ज्यान लिएका हुन् ।

हत्यामा संलग्न रहेको आरोपमा दुवै छोरालाई प्रहरीले नियन्त्रणमा लिएको छ । कीर्तिपुर नगरपालिका नं. ०६ पाण्डेछापका ४५ वर्षका माइलो छोरा शंकर महर्जन र ४० वर्षका कान्छो छोरा कृष्ण महर्जनलाई नियन्त्रणमा लिइएको प्रहरी वृत्त कीर्तिपुरले बताएको छ ।

प्रहरीका अनुसार मादक पदार्थ सेवन गरी उनीहरुले प्रेसर कुकर र लोहोरोले हानेर बाबुलाई घाइते बनाएका थिए । घाइतेको उपचारको क्रममा वीर अस्पतालमा मृत्यु भएको हो ।

मृतकका छोराउपर मुलुकी अपराध संहिता ऐन-२०७४ को परिच्छेद-१२ को ‘ज्यान सम्बन्धी कसूर’मा अनुसन्धान भैरहेको प्रहरीले जनाएको छ ।