आगलागीबाट जुम्लामा ४ जना बालबालिका बिते

जुम्लामा गएराति भएको आगलागीमा चार जना बालबालिकाको ज्यान गएको छ । तिला गाउँपालिकाका–३ को कुडारी सार्कीवाडा गाउँमा भएको आगलागीमा एउटै परिवार र नातेदार गरि चार जना बालबालिकाको मृत्यु भएको हो ।

मृत्यु हुनेमा मानसिंह सार्कीका दुई छोरी, एक छोरा र एक भान्जी हुन् । सार्कीका छोरीहरु ११ वर्षकी अनु, ३ वर्षकी दर्शना र १ वर्षका छोरा दीपेश तथा १४ वर्षकी भाञ्जी तिर्सना सार्कीको मृत्यु भएको हो ।

आगलागीबाट घाइते भएका मानसिंह र उनकी श्रीमती फागुनी र बहिनी रुन्चकलीलाई उपचारको निम्ति कर्णाली स्वास्थ्य विज्ञान प्रतिष्ठानमा लगिएको छ । मध्यरातमा घरमा लागेको आगलागीबाट दोस्रो र तेस्रो तला पूर्णरुपले क्षति भएको छ । आगलागीको कारण पत्ता लाग्न नसकेको प्रहरीले बताएको छ ।