धनुषा दुर्घटना : एक जना मृतकको पहिचान खुल्यो

धनुषामा गएराति भएको दुर्घटनामा तीन जनाले ज्यान गुमाएका छन् । रोकिराखेको ट्रक पछाडि मोटरसाइकल ठोक्किँदा उनीहरुले ज्यान गुमाएका हुन् ।

क्षिरेश्वरनाथ नगरपालिका ५ सिन्धुलीटोलमा ना.२ ख ८६२४ नम्बरको ट्रकमा गएराति साढे २ बजे लु. ८३ प ८६५१ नम्बरको मोटरसाइकल ठोक्किएको थियो ।

दुर्घटनामा मोटरसाइकलमा सवार तीनै जनाको घटनास्थलमा मृत्यु भएको धनुषाका प्रहरी नायव उपरीक्षक जीतेन्द्रप्रसाद बस्नेतले जानकारी दिनुभयो । उहाँका अनुसार मृतकमध्ये एक जनाको सनाखत भएको छ ।

जनकपुर उपमहानगरपालिका ४ का ४० वर्षीय रमेश चिल्लेवालका छोरा २० वर्षीय सुमित चिल्लेवालको शव सनाखत भएको छ । मृतक तीनै जनाको शव पोष्टमार्टमका लागि प्रादेशिक अस्पताल जनकपुरमा राखिएको छ ।

आफ्नै घर अगाडि रोकिराखेको ट्रकका धनी सिन्धुलीटोलका ४३ वर्षीय हरिनारायण राउतलाई भर्खरै मात्र प्रहरीले नियन्त्रणमा लिएको छ । ट्रक आफैँले चलाएका उनले राति साढे २ घटना भएकाले केही थाहा नभएको बताए ।