सिंहदरबारभित्रै रुखको हाँगा खसेर गुप्तचर कर्मचारी बिते

सिंहदरबारभित्र रूखको हाँगा भाँचिएर लाग्दा एक जनाको मृत्यु भएको छ । राष्ट्रिय अनुसन्धान विभागको कम्पाउण्डमा हिजो साँझको हुण्डरीबाट रूखको हाँगा भाँच्चिँदा विभागका एक जना कर्मचारीको मृत्यु भएको हो ।

मृत्यु हुनेमा पाल्पाको रम्बा गाउँपालिका–५ घर भई विभागमा सूचकको रूपमा कार्यरत २७ वर्षीय विजय कार्की हुन् । हाँगाले थिचेर घाइते भएका उनको सिभिल अस्पतालमा उपचारको क्रममा गएराति सवा ११ बजे मृत्यु भएको हो ।

प्रहरी परिसर काठमाडौँका प्रहरी उपरीक्षक दिनेशराज मैनालीका अनुसार हिजो राति पौने ८ बजे आएको निकै शक्तिशाली हुरीका कारण रूखको हाँगा भाँच्चिएर टाउकोमा खस्दा उनी गम्भीर घाइते भएका थिए । शव पोष्टमार्टमको निम्ति महाराजगञ्जस्थित टिचिङ अस्पतालमा राखिएको छ ।