अध्यक्षलाई राजीनामा बुझाएर निस्केका मन्त्री आले प्रधानमन्त्री भेट्न जाँदै
नेकपा एकीकृत समाजवादीमा मन्त्री हेरफेरको विषय पेचिलो बनिरहेका बेला संस्कृति, पर्यटन तथा नागरिक उड्डयन मन्त्री प्रेम आलेले राजीनामा दिनुहुने भएको छ । अहिले केहीबेरमा प्रधानमन्त्रीलाई राजीनामा बुझाएर साँझ मन्त्रालयमा पत्रकार सम्मेलन गरी यसबारे सम्पूर्ण जानकारी गराउने तयारी छ ।
हिजो पार्टी बैठकमा ४८ घण्टाभित्र राजीनामा दिने घोषणा गर्नुभएका आलेले आज बिहानै अध्यक्ष माधवकुमार नेपाललाई भेटेर राजीनामा बुझाउनुभएको थियो । अहिले उहाँ प्रधानमन्त्री शेरबहादुर देउवालाई भेट्न बालुवाटार निस्किनुभएको छ ।
‘अराजनीतिक’ भनिने मन्त्री आलेले नै नैतिकता देखाउँदै राजीनामाको निर्णयमा पुगेपछि मन्त्री छोड्न आनाकानी गरिरहेका अरु तीन जनालाई समेत दबाब परेको छ । हिजो साँझ प्रधानमन्त्री देउवालाई भेटेर मन्त्रीमा निरन्तरता दिन गरेको आग्रह असफल भएपछि स्वास्थ्यमन्त्री विरोध खतिवडा,शहरी विकास मन्त्री रामकुमारी झाँक्री र श्रम मन्त्री किसान श्रेष्ठले पनि आजै राजीनामाको तयारी गरिसकेको बताइन्छ ।
एकीकृत समाजवादीले गत जेठ २७ गते नै पार्टीका चार मन्त्रीलाई फिर्ता बोलाएर उनीहरुको ठाउँमा नयाँलाई पठाउने निर्णय गर्दै प्रधानमन्त्री देउवालाई सिफारिस पठाएको थियो ।
तर, मन्त्रीहरुले आफूहरुलाई हटाए सरकार ढालिदिने चेतावनी दिएपछि प्रधानमन्त्री देउवाले समाजवादीको निर्णय कार्यान्वयन गर्नुभएको छैन ।
टिप्पणीहरू