नागरिकता विधेयक फिर्ताबारे माओवादी अहिले नबोल्ने

सत्तारुढ नेकपा माओवादी केन्द्र संसदीय दलका प्रमुख सचेतक देव गुरुङले प्रमाणीकरणका लागि पठाएको नागरिकता विधेयक राष्ट्रपतिले फिर्ता गरेको विषयमा तत्काल प्रतिक्रिया नदिने बताउनुभएको छ । यसबारे पार्टीले औपचारिक धारणा सार्वजनिक गर्ने भएकाले तत्काल आफ्नो कुनै टिप्पणी नरहेको उहाँले प्रतिक्रिया दिनुभयो ।

उहाँले राष्ट्रपति भण्डारीको पत्र अध्ययन गरेर संविधानसम्मत ढंगले अघि बढ्ने पनि बताउनुभएको छ । जनआस्थासँग कुरा गर्दै गुरुङले भन्नुभयो, ‘विधिको शासनमा विश्वास गर्ने भएकाले सबै कुरा संविधानसम्मत हुनुपर्छ भन्ने हो । राष्ट्रपतिले पनि संविधानको अक्षरश: पालना गर्नुपर्छ । विधेयक फिर्ताको विषयमा के गर्ने भन्ने पार्टीमा छलफल गरेर धारणा बनाउँछौं ।’

राष्ट्रपतिले कुन दफा उल्लेख गरेर विधेयक फिर्ता गरेको हो त्यो प्रष्ट नभएकाले अहिले टिप्पणी गर्न नसक्ने उहाँको भनाइ छ । ‘समग्र प्रक्रियाका बारेमा प्रश्न उठाएको हो या कहाँ के नमिलेको हो भन्ने विषयमा प्रष्ट भएपछि मात्रै थप कुरा गर्न सकिन्छ’, गुरुङ्गले भन्नुभयो । तथापि सार्वभौम संसद्को दुवै सदनले पारित गरेर पठाएको विधेयक सामान्यतया: राष्ट्रपतिले रोक्न नमिल्ने उहाँले बताउनुभयो ।

संघीय संसद्को दुवै सदनबाट पारित भएर साउन १५ गते राष्ट्रपतिसमक्ष पेस भएको उक्त विधेयक १४ दिनपछि राष्ट्रपतिले आज साँझ फिर्ता गर्नुभएको हो । राष्ट्रपतिको उक्त निर्णयलाई लिएर सत्तारुढ नेपाली काँग्रेसले असन्तुष्टि जनाएको छ ।